सिंहदरबार संवाददाता
काठमाडौं । बाढी, पहिरो प्रभावित तथा जोखिममा परेकालाई तत्काल उदार र उचित राहतको व्यवस्था गर्न सरकारसँग सांसदहरुले माग गरेका छन् ।सोमबार प्रतिनिधि सभा बैठकको शुन्य समयमा बोल्दै अधिकांश सांसदहरुले सरकारसँग यस्तो माग गरेका हुन् ।
उनीहरुले अविरल वर्षाको कारण देशभर बाढी पहिरोको गएकाले त्यसबाट प्रभावित जनतालाई तत्काल राहत र उद्धारको व्यवस्था गर्न माग गरे । उनीहरुले सरकारले विपद् जोखिमको लागि उचित राहत र उद्धारको लागि राम्रो व्यवस्था नदेखिएको भन्दै प्रभावित क्षेत्रका जनतालाई तत्काल उद्धार गर्न माग गरे ।
नेकपा (एकीकृत समाजवादी)का सांसद शेरबहादुर कुँवरले शनिवारको बाढी पहिरोबाट भएको मानवीय र सम्पतीमा भएको क्षतिको सदनलाई जानकारी गराउन माग गरे । उनले अहिलेसम्म सरकारले आफ्नो दायित्व पूरा नगरेको बताए । उनले बाढी पहिरो पीडितलाई तत्काल गरेको राहतको के व्यवस्थाका विषयमा पनि जानकारी दिन आग्रह गरे ।
नेकपा एमालेकी सांसद शोभा ज्ञवालीले बाढी पहिरोमा परेकाहरुका लागि आवश्यक राहत र क्षतिपूर्तिको तत्काल व्यवस्था गर्न सरकारसँग माग गरिन् । उनले नेकपा एमाले लगायत अन्य दलहरुले वर्तमान सरकारलाई दिएको समर्थन फिर्ता लिँदा समेत प्रधानमन्त्री नाटकिय ढङ्गले अघि बढेको बताइन् । उनले प्रधानमन्त्रीले मुलुकलाई निकास दिनको निम्ति प्रधानमन्त्रीले राजीनामा दिनुपर्ने बताइन् ।
नेपाली काँग्रेसका सांसद सन्तोष चालिसेले बाढी र पहिरोको कारण मुलुकमा सबै सडकहरु अवरुद्ध भएको बताए । उनले बाढी पहिरो पीडितहरुको लागि सरकारले उचित राहत र उद्धारको व्यवस्था राम्रो नभएको भन्दै तत्काल व्यवस्था गर्न माग गरे । उनले उपत्यकाभित्रका समेत सडक तथा बस्तीहरु जोखिममा रहेको बताए ।
राष्ट्रिय स्वतन्त्र पार्टीका प्रमुख सचेतक सन्तोष परियारले नक्कली भूटानी नाम जोडिए पनि एक वर्षअघि अदालतमा पेश गरेको अभियोगपत्रमा प्रतिवादी नबनाइएका बेचन झालाई वर्तमान सरकारले नियन्त्रणमा लिएपछि राजनीतिक बेचैन शुरु भएको जानकारी गरे । उनले सुशासन र भ्रष्टाचारको बिरुद्धमा लागेको सरकारलाई दिएको विश्वासको मत फिर्ता लिएर जुन चलखेल भएको भन्दै बेचन झाहरुको केश अगाडि बढाउन माग गरे । उनले आगामी सरकारलाई पनि बेचैन झाहरुले चयन नदिने बताए ।
त्यस्तै, नेपाली काँग्रेकी सांसद सपना राजभण्डारीले बाढी पहिरोमा परेकाहरुलाई सरकारले तत्काल उद्धार गर्न माग गरे । उनले काठमाडौं उपत्यकामा समेत केही स्थानहरु डुबानमा पर्दा सर्वसाधरणहरुले दुःख कष्ट भोग्नुपरेको जानकारी गरे । उनले काठमाडौं उपत्यकामा डुबान नहुने गरी दीर्घकालिन समाधानको खोजी गर्न आवश्यक रहेको बताए ।
नेपाली काँग्रेसकी सांसद सीता मिजारले बाढी पहिरोको जोखिममा परेका नागरिकलाई तत्काल उद्धार र राहतको व्यवस्था गर्न सरकारसँग माग गरिन् । उनले विपद्मा परेका सर्वसाधरणलाई आपतकालिन उपचारको लागि हवाई एम्बुलेन्सको विशेष व्यवस्था गर्न पनि माग गरिन् ।
नेपाली काँग्रेसकी सचेतक शुसिला थिङले बाढी पहिरोमा परेका मृतक तथा घाईतेहरुको परिवारलाई उचित राहत तथा उद्धार व्यवस्था गर्न माग गरेकी छिन् । उनले राष्ट्रिय परिचयपत्र बनाउन विवाहित महिलाले सिन्दुर पुस्नुपर्ने कार्य हिन्दु संस्कृति माथिको धावा भएको बताइन् । उनले हिन्दु संस्कृतिको पहिचान मेटिने गरी बनाउने राष्ट्रिय परिचयपत्रको भत्र्सना गर्ने बताइन् । उनले राष्ट्रिय परिचयपत्र बनाउँदा सिन्दुर र पोते खोल्ने कार्य तत्काल बन्द गर्न माग गरिन् ।
प्रतिक्रिया दिनुहोस्