सिंहदरबार संवाददाता
काठमाडौं । नेपाली काँग्रेसका सांसद पूर्णबहादुर तामाङले निर्माण व्यवसायीहरुले गुणस्तरिय काम गर्न छाडेको बताए । शनिबार निर्माण व्यवसायी महासंघ अन्तर्गतको एशोसिएट सदस्य समन्वय समितिको १२औं साधारण सभामा बोल्दै सांसद तामाङले यस्तो बताएका हुन् ।
उनले निर्माण व्यवसायीहरुले गुणस्तरीय काम दिन नसक्दा जिल्लामा विकास निर्माणका काम लिएर जाने वातावरण नभएको उल्लेख गरे । उनले जिल्लामा सडक निर्माण लगायत अन्य विकास निर्माणका काम दिएपनि निर्माण व्यवसायीहरुले गुणस्तरीय काम दिन छाडेको भन्दै निर्माण व्यवसायीहरुलाई गुणस्तरीय काम दिन आग्रह गरे ।
सांसद तामाङले गत वर्ष जिल्लामा ५० लाखको बजेट लैजाँदा सडक निर्माणको लागि निर्माण व्यवसायीले ३२, २८ हुँदै २२ लाखमा बेचेर कम गुणस्तरको काम गरेको जानकारी दिए । उनले निर्माण व्यवसायीहरुले विकास निर्माणको काम टेण्डर अनुसार गुणस्तरीय दिन आवश्यक रहेको बताए ।
उनले ठेक्का पाएपछि टेण्डर अनुसार काम गर्दा मात्रै निर्माण व्यवसायीहरुको छवि राम्रो हुने उल्लेख गरे । सांसद तामाङले सडक पिच गर्दा ८ बोरा सिमेन्टको प्रयोग हुनुपर्नेमा ३ बोरामा काम गरिरहेको समेत पाएको बताए । उनले अर्को तिर विकास निर्माणको काममा कर्मचारीहरुले निर्माण व्यवसायीहरुलाई धेरै दुःख दिएको भन्दै देशमा सचिवदेखि मुख्य सचिवसम्मका कर्मचारीहरु करारमा राख्न आवश्यक भएको उल्लेख गरे ।
aउनले नेपाली काँग्रेसको सरकार हुँदा डा.प्रकाशशरण महत अर्थमन्त्री बनाउन ज्यान दिएर लागे पनि अर्थमन्त्री भएर रामेछापलाई एक रुपैयाँ पनि बजेट नदिएको गुनासो गरे । उनले अहिले धेरै व्यवसायी साथीहरुको हालत पातलो भएको भन्दै निर्माण व्यवसाय क्षेत्रबाट सांसद भएकाहरुले निर्माण व्यवसायीहरुको पक्षमा राम्रो काम गर्न नसकेको बताए । उनले महिनामा १० करोड बढी राज्यबाट तलवभत्ता खाने सांसदहरुले अहिलेसम्म संसदको एउटा अधिवेशनमा एउटा विधेयकसमेत पास गर्न नसकेको बताए ।
प्रतिक्रिया दिनुहोस्