सिंहदरबार संवाददाता
नेपालगञ्ज । बाँकेको जमुनाह नाकामा रहेको सूचना केन्द्र ३ वर्षदेखि कामविहीन भएको छ । तेस्रो मुलुकबाट नेपाल भित्रिने पर्यटकलाई सूचना दिने र पर्यटकीय गन्तव्यस्थलका विषयमा जानकारी दिन स्थापना गरिएको सो सूचना केन्द्र भारतीय पक्षका कारण अध्यागमन कार्यालय सञ्चालन नहुँदा कामविहीन भएको हो ।
अहिले उक्त कार्यालयले पर्यटन प्रवद्र्धनका केही कार्यक्रम मात्रै सञ्चालन गर्दै आएको सूचना केन्द्रका सूचना अधिकारी कान्ता भण्डारीले जानकारी दिए । उनले कोरोनाकालपछि पर्यटक भारतबाट नेपाल र नेपालबाट भारत जान बन्द भएको बताए । कहिलेकाहीँ झुक्किएर आउनुभएको छ, तर उहाँहरुलाई हामीले सबै विषय जानकारी दिएर काठमाडौँसमेत पठाएका छौँ उनले बताए ।
भण्डारीले केही दिनअघिमात्रै जर्मनका पर्यटक आएर फर्केको जानकारी दिँदै सूचना केन्द्र सञ्चालनमा नआउँदा पर्यटक अलमल परेपछि उनीहरुलाई सहजीकरण गर्ने काम गरिएको बताए । पर्यटन विकास परिषद् रुपन्देहीका कार्यकारी निर्देशक रामु जोशीले पर्यटन सूचना केन्द्र अब छिट्टै सञ्चालनको तयारीमा रहेको उल्लेख गर्दै पर्यटनसम्बन्धी डिजिटल र होडिङबोर्ड राख्ने तयारी भइरहेको जानकारी दिए ।
केही समयपछि त्यसलाई मर्मतसम्भार गरेर नयाँ स्वरुपमा वैशाखको दोस्रो साताबाट नै सञ्चालनमा आउँछ उनले भने । अहिले दैनिक ज्यालादारीमा रहेका दुई कर्मचारीबाट मात्रै सो कार्यालय सञ्चालन भइरहेको छ । पर्यटन सूचना केन्द्र पर्यटन विकास परिषद्अन्तर्गत पर्छ ।
नेपाल एशोसिएशन अफ टुर्स एण्ड ट्राभल एजेन्ट्स (नाट्टा) च्याप्टर बाँकेका अध्यक्ष श्रीराम सिग्देलले सूचना केन्द्र सञ्चालनमा नआउँदा बाँकेको पर्यटन बजार प्रभावित भएको उल्लेख गर्दै यसको सञ्चालनका लागि दबाब आवश्यक भएको बताए ।
प्रतिक्रिया दिनुहोस्