सिंहदरबार संवाददाता
गण्डकी । गण्डकी प्रदेशमा ‘सहयोगापेक्षी सडक मानवमुक्त देश’ नाराका साथ मानवसेवा आश्रमका भवन निर्माण भईरहेको छ । भाडाको कोठाबाट सुरु भएको मानवसेवा आश्रमले सरकार र दाताको सहयोगमा भवन निर्माणलाई गति दिएको हो ।
आश्रमका गोरखा, कास्की, बागलुङ र लमजुङ शाखा छिट्टै आफ्नै भवनबाट सेवा सञ्चालन गर्ने तयारीमा छन् । कास्कीको पोखरा महानगरपालिका–२५ हेम्जा, बागलुङको बागलुङ नगरपालिका–४ निरयघाट, लमजुङको बेँसीसहर नगरपालिका–९ पाखाथोक र गोरखाको गोरखा नगरपालिका–८ अर्चलेमा आश्रमको भवन निर्माणाधीन छन् । हेम्जामा १० करोडको लागतमा भवन बन्न लागेको कास्कीस्थित आश्रमका संयोजक सदिस पुनले जानकारी दिए । भवनको भुइँतला र तेस्रो तलाको निर्माण सम्पन्न हुने चरणमा रहेको उनको भनाइ छ ।
“बीचको तलाका लागि पोखरा महानगरले ७१ लाख सहयोग गर्ने कबोल गरेकाले बजेटको पर्खाइमा छौँ, अरु दाताबाट पनि सहयोग आइरहेको छ”, संयोजक पुनले भने । ५ लाख ११ हजार १ सय ११ सहयोग गर्ने दाताको नाममा कोठाको नामकरण गरिने भएपछि २० जनाभन्दा बढी त्यस्ता सहयोगी जुटेको उनले बताए । आश्रम निर्माणका लागि विसं २०७९ माघमा आयोजना गरिएको महायज्ञबाट ३ करोड बढी आर्थिक सङ्कलन गरिएको थियो । विसं २०७५ चैतदेखि निर्माण थालिएको उक्त आश्रम भवन दुई सय जनालाई आवसीय सुविधा दिने गरी बन्न लागेको हो । हेम्जा र छोरेपाटन गरी कास्कीमा आश्रमका दुई सेवाकेन्द्र रहेका छन् ।
छोरेपाटन सेवाकेन्द्रमा महिला मात्र आश्रित रहेको संयोजक पुनले जानकारी दिए । श्रम निर्माणमा प्रदेश सरकार, पोखरा महानगरलगायत सरकारी निकाय, सङ्घसंस्था र सर्वसाधारण दाताको सहयोग रहेको छ । आश्रमको बागलुङ शाखा भवनको झण्डै ५० प्रतिशत काम सकिएको निर्माण समितिका अध्यक्ष शिव खड्काले जानकारी दिए । स्रोत जुटाएर दुई वर्षभित्रमा भवन निर्माण सम्पन्न गर्ने लक्ष्य लिइएको उनको भनाइ छ ।
१२ करोड ७५ लाखको लागत योजनासहित बागलुङ नगरपालिका–४ निरयघाटमा आश्रम निर्माणको काम भइरहेको हो । अध्यक्ष खड्काका अनुसार आश्रमका लागि चालु आवमा गण्डकी प्रदेश सरकारबाट २५ लाख, बागलुङ नगरपालिकाबाट ४ लाख, बरेङ गाउँपालिकाबाट ६ लाख, गलकोट नगरपालिकाबाट ५ लाख र म्याग्दीको बेनी नगरपालिकाबाट ४ लाख बजेट विनियोजन भएको छ । प्रदेश सरकाले गत आवमा ५० लाख बजेट दिएको अध्यक्ष खड्काले जानकारी दिए ।
परिवार र समाजबाट अपहेलित भएर सडकमा पुगेकाहरूको संरक्षण गर्ने उद्देश्यले स्थानीय अभियानकर्मी तथा स्वयंसेवी युवाको पहलमा विसं २०७२ मा बागलुङमा आश्रम खोलिएको थियो । बागलुङ नगरपालिकाले जग्गा व्यवस्थापन गरिदिएपछि दुई वर्षअघि आश्रमको भवन निर्माण सुरु भएको थियो । उक्त भवनमा योग, ध्यान र प्रशिक्षणका लागि छुट्टै कक्ष रहनेछ । गोरखा र लमजुङ शाखाको भवन निर्माण पनि तीव्रगतिमा भइरहेको मानवसेवा आश्रमले जनाएको छ ।
आश्रमका अनुसार लमजुङ शाखा भवनको १५ करोड र गोरखाको शाखा भवनको ३ करोड लागत योजना रहेको जनाइएको छ । सहयोगापेक्षी सडक आश्रितमानवको उद्धार र जीवनरक्षामा आश्रम क्रियाशील छ । आश्रमले बेसहारा, अशक्त, अभिभावकविहीन, मानसिक तथा शारीरिकरूपमा कमजोर, सडकआश्रित मानवहरूको व्यवस्थापन, औषधोपचार र पालनपोषण गर्दै आएको छ । गण्डकीका चारसहित देशभरका ११ जिल्लामा आश्रमका भवन बनिरहेको आश्रमको केन्द्रीय कार्यालयले जनाएको छ । मानवसेवा आश्रमले अहिलेसम्म १९ जिल्लामा सेवा विस्तार गरिसकेको जनाइएको छ । कार्यालयका अनुसार हाल देशभरका आश्रमका शाखा र सेवा केन्द्रमा गरी एक हजार छ सय बढीले आश्रय लिइरहेका छन् ।
हालसम्म दुई हजार आठ सय बढीको पारिवारिक पुनःमिलन भएको र दुई हजार दुई सय बढी उपचारपछि स्वेच्छाले आश्रमबाट बाहिरिएको जनाइएको छ । आश्रममै रहेका बेला ८ सय २६ जनाले मृत्युवरण गरेको र ६ सय ३१ जनाको सामुदायिक पुनःस्थापना भएको छ । ‘सबैका लागि खाना, नाना र छाना’को आदर्श वाक्यसहित नेपाललाई ‘सडकआश्रित मानवरहित राष्ट्र’ बनाउने महाअभियानमा मानवसेवा आश्रम जुटेको हो ।
प्रतिक्रिया दिनुहोस्