चैत १ गतेदेखि ‘फ्लोरा एक्स्पो’ हुने, विद्यार्थीलाई विशेष छुट

काठमाडौं । फ्लोरिकल्चर एशोसिएसन नेपालले चैत १ गतेदेखि ४ गतेसम्म २५औं ‘फ्लोरा एक्स्पो’ आयोजना गर्ने भएको छ ।  ‘स्वच्छ वातावरण तथा आर्थिक समृद्धि लागि पुष्प व्यवसाय’ भन्ने नाराका साथ भृकुटिमण्डपमा एक्स्पो आयोजना हुने भएको हो ।

प्रदर्शनीमा व्यवसायिक स्टल ६०, ल्याण्डस्केपिङ्ग स्टल ३, अफिसियल स्टल ८ , प्रतियोगितात्मक प्रदर्शनी स्टल १ र फूड स्टल १ जम्मा ७३ स्टलहरु रहने आयोजकले जानकारी दिए । एक्स्पोमा नर्सरी व्यवसायीहरुद्वारा उत्पादित आलंकारिक फूल विरुवा। मौसमी फूल, स्टल सजावट, बगैँचा सजावट, पुष्प सजावट जस्ता उत्कृष्ट विधाहरुमा प्रतिस्पर्धा गराई पुरस्कृत समेत गरिने एशोसिएसनले जनाएको छ ।

फ्लोरिकल्चर एशोसिएसन नेपालका उपाध्यक्ष तथा मेला संयोजक सिताराम पन्तले पुष्प व्यवसाय गर्न चाहने नव उद्यमी, जिज्ञासु एंव अनुसन्धान गर्न चहानेहरुको लागि यो मेला महत्वपूर्ण रहेको बताएका छन् । पन्तले भने, ‘नेपालमा पुष्प व्यवसायमा लगानीकर्ता बढाउँन भारतबाट अबैध रुपमा हुने आयातलाई प्रतिबन्ध लगाउनुपर्छ । हामी आत्मनिर्भर बन्न आयात रोक्नुपर्छ । कृषि पेसाकर्मीहरुले सरकारबाट कुनै पनि प्रकारको अनुदान पाएको छैन ।’

‘हामीसँग अलिकति बजेटको पनि अभाव भएकोले हामीले यो मेलामा टिकट सिस्टम राखेका छौँ । विद्यार्थीहरुका लागि १०० रुपैयाँ र सर्वसाधारणका लागि १५० रुपैयाँ टिकट कायम रहेको छ । यो मेलाका लागि सरकाराबाट कुनै सहयोग छैन’ पन्तले बताए । पुष्प मेलामा पुष्प नर्सरी, पुष्प फर्म, पुष्प तथा पुष्पजन्य आपुर्तिकर्ता कम्पनीहरु, व्यवसायीहरु तथा बिभिन्न संघ संस्थाहरुको सहभागिता रहने आयोजकले जानकारी दिए ।