पर्वतका ग्रामीण सडकमा चारवटा मोटरेबल पुल निर्माण गर्ने

पर्वत । पर्वतका ग्रामीण सडकमा चालू आर्थिक वर्षमा चारवटा मोटरेबल पुल निर्माण हुने भएका छन् । जिल्लाका विभिन्न क्षेत्रमा रहेका सडकलाई बाह्रैमहिना सञ्चालन गर्ने उद्देश्यले खोलामा मोटरेबल पुल निर्माण गर्न लागिएको हो ।

पूर्वाधार विकास कार्यालय पर्वतका अनुसार मोदी गाउँपालिकाको लिदि खोला, पैँंयू गाउँ गाउँपालिकाको सरौ र भोर्लेखोला तथा कुश्मा र फलेवास नगरपालिकाको सिमानामा पर्ने मल्र्याङ्दीखोलामा मोटरेबल पुल निर्माण गरिने भएको छ । चार पुलमध्ये मोदी–६ र ८ को सिमानामा रहेको लिदिखोलामा १६ मिटर लामो पुल निर्माण धमाधम भइरहेको पूर्वाधार कार्यालयका प्रमुख गुरुदत्त अधिकारीले जानकारी दिए ।

उनका अनुसार डिमुवा–राम्जा सडक खण्डमा पर्ने उक्त पुलको करिब ४० प्रतिशत निर्माण सकिएको छ । प्रमुख अधिकारीले २ करोड ५३ लाखको लागतमा निर्माण हुन लागेको बताए । यो पुल निर्माणपछि मोदी–७ राम्जा, वडा नं ८ चित्रे र कुश्मा नगरपालिका–१४ आर्थरडाँडाखर्कका बासिन्दा लाभान्वित हुने छन् । वर्षायाममा सरौखोलामा आउने ठूलो बाढीका कारण पैंँयू गाउँपलिकाको सरौखोला र महाशिला गाउँपालिकाको होश्राङदी, भोसक्सिङ र बालाकोटका नागरिकले समस्या भोग्दै आएका छन् । पुल निर्माणपछि बाह्रैमहिना सहज रुपमा सडक सञ्चालन हुने विश्वास बढेको थानीय खगेन्द्र तिवारीले बताए ।

कुश्मा–१० पीपलटारी र फलेवास–३ शङ्करपोखरी जोड्नेगरी मल्याङदीखोलामाथि मोटरेबल पुल निर्माणको प्रक्रिया अघि बढेको छ । पुल निर्माणका लागि बोलपत्र आह्वान भइसकेको कार्यालयले जनाएको छ । करिब १६ मिटर लामो यो पुल झण्डै ४ करोडको लागतमा बन्नेछ । बहुवर्षीय योजनाअन्तर्गत निर्माण हुने उक्त पुल दुई वर्षभित्र सम्पन्न हुने अधिकारीले बताए । यो पुलका लागि चालू आवमा ७५ लाख विनियोजन भएको छ । यसैगरी दक्षिण पर्वतको पैँयू गाउँपालिका–७ स्थित भोर्ले खोला पनि मोटरेबल पुलको निर्माण प्रक्रिया अघि बढेको छ । बहुवर्षीय योजनाअन्तर्गत निर्माण हुने यो पुलका लागि चालू आवमा ३० लाख विनियोजन भएको छ । यसै वर्ष बोलपत्र आह्वान प्रक्रिया पूरा गरी सम्झौता गरिने भन्दै आगामी वर्षको बजेटबाट पुल निर्माण सुरु हुने कार्यालय प्रमुख अधिकारीले बताए ।

अधिकारीका अनुसार चारवटै मोटरेबल पुलको निर्माण अवधि दुई वर्षको रहेको छ । आगामी दुई वर्षभित्र चारवटै पुल निर्माण सम्पन्न हुने छन् । निर्माणाधीन लिदिखोला र छत्तिसेघाट मोटरेबल पुल चालू आवमै सम्पन्न हुने उनको भनाइ छ । बजेटको सुनिश्चितता भएपछि बाँकी दुई पुल निर्माण थालिे प्रमुख अधिकारीले बताए । मोटरेबल पुल निर्माणपछि बर्खायाममा ठप्प जस्तै हुने ती सडक सञ्चालन हुने भन्दै स्थानीय खुसी भएका छन् ।