दुई दिन बाँकी छँदै सीईडीबीको आईपीओमा ५ गुणा बढी आवेदन

काठमाडौं । सीईडीबी हाइड्रोपावर डेभलपमेन्ट कम्पनीको आईपीओमा आइतबारसम्म १२ लाख ११ हजार जनाले आवेदन दिएका छन् । कम्पनीको सेयरमा आइतबार साँझ ५ बजेसम्म १२ लाख ११ हजार ३ सय ४० जनाले १ करोड ८८ लाख ६४ हजार ३ सय २६ कित्ता सेयर माग गरेका हुन् ।

सीईडीबीको २५ करोड १८ लाख २३ हजार रुपैयाँ बराबरको आईपीओ शुक्रबार बाट खुलेको हो । लगानीकर्ताले मंगलबारसम्म आवेदन दिन पाउँछन् ।

कुल निष्काशनमध्ये १ लाख २५ हजार ९ सय ११ कित्ता सेयर सामूहिक लगानी कोषलाई र ५० हजार ३६५ कित्ता सेयर कर्मचारीहरुका लागि सुरक्षित गरिएको छ । बाँकी २३ लाख ४१ हजार ९ सय ५४ कित्ता सेयरमा भने सर्वसाधारणले आवेदन दिन सक्छन् ।

आईपीओमा न्यूनतम १० कित्तादेखि अधिकतम २५ लाख १८ हजार २ सय ३० कित्तासम्म आवेदन दिन सकिनेछ ।

आइपीओ जारीपछि कम्पनीको चुक्ता पुँजी ८३ करोड ९४ लाख १० हजार रुपैयाँ पुग्नेछ । आवेदन गर्नेमध्ये २ लाख ३४ हजारलाई १०–१० कित्ता आइपीओ पर्नेछ ।