४ महिनामा आयात र निर्यात दुबै घट्यो, ५ खर्बको आयात हुँदा ५० अर्बको निर्यात

काठमाडौं । चालू आर्थिक वर्ष २०८०/८१ को चौथो महिना अर्थात कात्तिक महिनासम्ममा आयात निर्यात दुबै घटेको छ। भन्सार विभागले बिहिबार सार्वजनिक गरेको तथ्यांक अनुसार यस अवधिमा आयात ३.७९ प्रतिशतले घटेको छ भने निर्यात ७.६८ प्रतिशतले घटेको छ।

विभागका अनुसार चालु आवको कात्तिकसम्म ५ खर्ब १२ अर्ब ५० करोड रुपैयाँको वस्तु तथा सेवा आयात भएको छ। यो आयात गत आर्थिक वर्षको सोही अवधिको तुलनामा ३.७९ प्रतिशतले कम हो। गत आवको सोहि अवधिमामा ५ खर्ब ३२ अर्ब ६९ करोडको वस्तु तथा सेवा आयात भएको थियो।

त्यस्तै, कात्तिक महिनासम्ममा ५० अर्ब ५६ करोड ५३ लाख रुपैयाँको वस्तु तथा सेवा निर्यात भएको छ । यो रकम गत आर्थिक वर्षको सोही अवधिको तुलनामा ७.६८ प्रतिशत कम हो। गत आर्थिक वर्ष चार महिनामा नेपालले ५४ अर्ब ७७ करोडको निर्यात भएको थियो।

यस अवधिमा नेपालले ४ खर्ब भन्दा बढी व्यापार घाटा व्यहोरेको छ । यस अवधिमा नेपालले ४ खर्ब ६१ अर्ब ९३ करोड ८० लाख व्यापार घाटा व्यहोरेको हो । यो व्यापार घाटा गत आवको सोहि अवधिको भन्दा ३.३४ प्रतिशतले कम हो । गत वर्षको सोहि अवधिमा नेपालले ४ खर्ब ७७ अर्ब ९१ करोड ७० लाख रुपैयाँ व्यापार घाटा व्यहोरेको थियो ।

नेपालले कात्तिक महिनासम्म ५ खर्ब ६३ अर्ब ६ करोड ८८ लाख रुपैयाँ बराबरको वैदेशिक व्यापार गरेको छ । गत वर्षको सोहि अवधिमा ५ खर्ब ८७ अर्ब ४६ करोड ५६ लाख रुपैयाँ बराबरको वैदेशिक व्यापार गरेको थियो ।