सरकारले सकसमा परेको निर्माण व्यवसायको सम्बोधन गरेन: अध्यक्ष सिंह

काठमाडौं । निर्माण व्यवसायी महासंघका अध्यक्ष रवि सिंहले निर्माण व्यवसाय सकसमा परेको बताएका छन् । सोमबार नेपाली काँग्रेस पार्टी केन्द्रिय कार्यालय सानेपामा आयोजित काँग्रेस निकट निर्माण व्यवसायीहरुको राष्ट्रिय भेलामा बोल्दै उनले यस्तो बताएका हुन् ।

उनले समस्या समाधानका लागि नियमावली संशोधनका लागि सरकारलाई सुझाव दिएको तर त्यसको कुनै सुनुवाई नभएको बताउँदै सरकारले निर्माण व्यवसायीको समस्या सम्बोधनका लागि पहल नगरेको गुनासो गरे ।

उनले व्यवसायीहरुसँग छलफलै नगरी सरकारले संशोधित नियमावली ल्याउन लागेकाले निर्माण व्यवसायीहरुको समस्या समाधान हुनेमा ढुक्क हुन नसकिने बताउँदै सरकारले व्यवसायीहरुको साझा धारणा पहिल्याएर नियमावली संशोधन नगर्दा पटक पटक संशोधन गर्नुपर्ने अवस्था आएको आरोप लगाए ।

उनले भने, ‘निर्माण व्यवसाय सकसमा परेको छ । हामी नेपाली काँग्रेससँग आवद्ध निर्माण व्यवसायीहरु अहिले हामीले नेपाली कांग्रेस सरकारमा सहभागिता भएपनि हामीले हाम्रा समस्याहरु सरकारसम्म पुर्‍याउनलाई हामीलाई अत्यन्त सकस छ । हामीले धेरै प्रयत्न गरेपनि हाम्रा अवाजहरु हाम्रा समस्याहरुलाई सरकारले सम्बोधन नगरी दिएको कारणले गर्दा र हाम्रो यो सार्वजनिक खरिद ऐन, नियम, एसबिडीलगायत निर्माण उद्योगमैत्री पूर्वाधारमैत्री नभएको कारणले गर्दा निर्माण उद्योग अत्यन्त संकटमा छ । र हामीले सरकारसँग सम्माननीय प्रधानमन्त्रीज्युसँग पुस २७ गते भएको राष्ट्रिय भेलापश्चात मान्य समापति ज्यूले समन्वय गरी दिनुभएपछि सम्माननीय प्रधानमन्त्री ज्यूसँग छलफल गर्ने मौका पाऔँ र उहाँले व्यवसायीहरुको समस्यालाई चाँडा भन्दा चाँडो सम्बोधन गरी दिने आवश्वसन दिनुभएको छ ।’

‘हामीले उहाँलाई माघ १८ गते भेट्दै गर्दाखेरि आज चैत ११ गतेसम्म पनि हाम्रा समस्याहरुलाई सम्बोधन गर्ने सार्वजनिक खरिद नियमावलीलाई संशोधन गर्दै गर्दाखेरि हामीले विगतमा नियमावलीको संशोधन हुँदै गर्दा सरोकारवाल पक्षसँग छलफल नगरी नियमावली ल्याउने प्रवृत्ति छ त्यसले सरकारले ल्याएको नियमावलीहरु पटक पटक संशोधन गर्नुपर्ने देखिएको छ त्यसैले हामीले माननीय प्रधानमन्त्री, शहरी विकास मन्त्री, अर्थमन्त्री, भौतिक पुर्वाधार निर्माण मन्त्री तथा मुख्य सचिवलाई सरोकारवालासँग समन्वय गरेर नियमावलीको संशोधन गर्ने, ऐनको संशोधन गर्नका लागि हामीले पटक पटक अनुरोध गरेका छौँ । वास्तविक रपमा अहिे सार्वजनिक नियमावलीको संशोधन आउँदैछ भन्ने छ, त्यो संशोधन निर्माण व्यवसायीको समस्यालाई सम्बोधन हुने कुराहरु कसरी आउँदैछ भन्ने कुराहरु हामीसँग छलफल गरिएको अवस्था छैन’ उनले बताए ।

अध्यक्ष सिंहले अर्थतन्त्रलाई चलायमान बनाउने निर्माण व्यवसायी देशको समृद्धिको संवाहक भएको बताए । उनले केही उद्योगहरुले गरेको कार्टेलिङलाई सरकारले प्रोत्साहन गरेको आरोपसमेत लगाए ।