गभर्नर नियुक्तिका लागि अर्थमन्त्रीको नेतृत्वमा तीन सदस्यीय समिति गठन,विज्ञ सदस्यमा डा. विश्वनाथ पौडेल

काठमाडौं । सरकारले गभर्नर नियुक्तिका लागि तीन सदस्यीय सिफारिस समिति गठन गरेको छ । मन्त्रिपरिषदको फागुन २६ गते राती बसेको मन्त्रिपरिषदको निर्णयबाट सिफारिस समिति गठन भएको हो ।

समितिमा संयोजक अर्थमन्त्री विष्णुप्रसाद पौडेल रहेका छन् । यस्तै, विज्ञ सदस्यमा डा. विश्वनाथ पौडेल रहेका छन् । यसैगरी, पुर्व गभर्नर मध्येबाट विजयनाथ भट्टराई रहेका छन् । १८ ‌औं गभर्नर सिफारिस समितिमा मन्त्रिपरिषद कार्यालयबाट फोन आएपनि पत्र हालसम्म हात नपरेको एक सदस्यले सिंहदरबारसँग बताए । ती सदस्यले भने, “छनोट समितिमा बस्ने कुरा भएको छ, औपचारिक रुपमा पत्र आइपुगिसकेको छैन् ।”

हालका राष्ट्र बैंकका गभर्नर महाप्रसाद अधिकारीको कार्यकाल २०८१ चैत १२ गतेबाट सकिदैछ । १७ औं गभर्नरको रुपमा सफल कार्यकाल सकेर अधिकारी बिदा हुँदै छन् । पुर्व गभर्नर भट्टराईलाई सरकारले २०६१ सालमा १३ गभर्नरको रुपमा जिम्मेवारी दिएको थियो । यस्तै, विज्ञ सदस्यको रुपमा रहेको डा. पौडेले राष्ट्रिय योजना आयोगका पुव उपाध्यक्ष हुन् । उनी अर्थशास्त्री समेत हुन् ।

 यी हुन आकांक्षी

नेपाल राष्ट्र बैंकको गभर्नर बन्नका लागि करिब दर्जन व्यक्तिहरुको नाम चर्चामा छ । तिमध्ये कोहि साझा उम्मेदवार बन्ने प्रयासमा देखिन्छन् भने आस्थाका आधारमा दलका नेता फकाउँदैछन् । केहि दावेदारहरु भने व्यवसायीक घरानाको दैलोमा समेत धाईरहेको देखिन्छ ।

गभर्नर बन्ने दौडमा हालका डेपुटी गभर्नरद्धय निलम ढुंगाना र बम बहादुर मिश्र पनि देखिन्छन् । अर्थमन्त्री नेतृत्वको गभर्नर सिफारिस समितिले तीन जनको नाम सिफारिस गर्दा दुई डेपुटीमध्ये एक जनाको नाम अनिवार्य समावेश गर्नुपर्ने कानुनी व्यवस्था छ । उनीहरु दुबै जना सिफारिसमा पर्ने र गभर्नर बन्ने कसरतमा छन्, जुन स्वभाविक पनि हो ।

त्यस बाहेक राष्ट्र बैंकका सञ्चालक समिति सदस्य चिन्तामणी शिवाकोटी र डा. रबिन्द्र प्रसाद पाण्डेको नाम पनि गभर्नर बन्नेहरुको चर्चा सूचिमा छ । राष्ट्र बैंकका कार्यकारी निर्देशक डा. प्रकाश कुमार श्रेष्ठ र डा. गुणाकर भट्ट पनि गभर्नरको दौडमा छन् । त्यस बाहेक राष्ट्र बैंकको कार्यकारी निर्देशकबाट केहि महिना अघि मात्रै अवकास पाएका देवकुमार ढकाललाई सम्भावित गभर्नरका रुपमा हेरिएको छ ।

चार वटा वाणिज्य बैंकका सीईओहरु पनि गभर्नर बन्नेहरुको चर्चा सूचिमा देखिन्छन् । नबिल बैंकका सीईओ ज्ञानेन्द्र ढुंगानाले गभर्नर बन्ने तयारी गरेको केहि समय भैसकेको छ । त्यस बाहेक कृषि विकास बैंकका सीईओ गोबिन्द गुरुङ पनि गभर्नर बनाईदिने सुत्रहरुको खोजिमा रहेको बताइन्छ । प्रभु बैंकका सीईओ अशोक शेरचन र माछापुच्छ्रे बैंकका सीईओ सन्तोष कोइरालाको नाम पनि गभर्नरको रेसमा चढेको छ ।

शक्तिशाली व्यवसायीक घरानाहरुको तर्फबाट लगानी बोर्डका पूर्व सीईओ सुशिल भट्टको नाम प्रतिष्पर्धा सूचिमा अघि सारिएको बताइन्छ । त्यस बाहेक पूर्व अर्थ सचिव रामेश्वर खनाल र राष्ट्रिय बाणिज्य बैंकका पूर्व सीईओ किरण श्रेष्ठको नाम पनि चर्चामा छ । यी दुबैले आफुलाई काँग्रेस–एमाले र व्यवसायीक घरानाहरुको समेत साझा उम्मेदवारका रुपमा अघि सार्ने तयारी गरेका छन् । यी दुई पात्रलाई हेरेर नै सरकारले अर्थमन्त्रालय सम्वद्ध सार्वजनिक निकायका पदाधिकारी तथा सदस्यहरुको नियुक्ती र मनोनयन सम्बन्धी मापदण्ड २०७३(पहिलो संसोधन) खारेजीको तयारी गरेको स्रोतहरुको दाबी छ ।

हाल एशियाली विकास बैंकमा काम गरिरहेका समिर खतिवडाले पनि गभर्नरका लागि लाइन मिलाउने प्रयास गरिरहेको बताइन्छ ।