सिंहदरबार संवाददाता
त्रिवेणी । नवलपरासी (बर्दघाट सुस्तापूर्व) नवलपुरमा गत आर्थिक वर्षमा २६ अर्बभन्दा धेरै राजस्व संकलन भएको छ । कावासोतीस्थित आन्तरिक राजस्व कार्यालयले आर्थिक वर्ष २०७९/८० मा २६ अर्ब ३१ करोड १२ लाख ७४ हजार राजस्व संकलन गरेको प्रमुख कर अधिकृत ज्ञानहरि पन्थीले बताए।
उक्त कार्यालयले सबैभन्दा धेरै अन्तःशुल्कतर्फ २५ अर्ब १६ करोड ९१ लाख १६ हजार राजस्व सङ्कलन गरेको छ । यसैगरी आय कर ६३ करोड ९८ लाख ५५ हजार, मूल्य अभिवृद्धि कर ३८ करोड २५ लाख ६५ हजार, ब्याज ६ करोड १३ लाख ७३ हजार, स्वास्थ्य सेवा कर ४ करोड ३० लाख २० हजार, घर बहाल कर एक करोड ५३ लाख ४४ हजार संकलन भएको प्रमुख कर अधिकृत ज्ञानहरि पन्थीले बताए।
आर्थिक वर्ष २०७९/८० मा उक्त कार्यालयले कूल ३२ अर्ब १२ करोड ९३ लाख ६१ हजार राजस्व सङ्कलनको लक्ष्य लिएकामा लक्ष्यभन्दा कम २६ अर्ब ३१ करोड १२ लाख ७४ हजार (८१.८९ प्रतिशतं राजस्व सङ्कलन भएको प्रमुख कर अधिकृत पन्थीले बताए।
कूल लक्ष्यको ९६ प्रतिशत अन्तःशुल्कतर्फ मात्रै राजस्व सङ्कलनको लक्ष्य राखिएको थियो । खपत बढ्ने लक्ष्य राखिए पनि अर्थतन्त्रमा आएको सङ्कुचनले गर्दा अन्तःशुल्क सङ्कलनमा समेत कमी आउँदा लक्ष्य हासिलमा असर परेको प्रमुख कर अधिकृत पन्थीले बताए। “अर्थतन्त्रमा आएको सङ्कुचनले आम्दानीमा कमी, घरजग्गालगायत कारोबारमा कमी हुँदा खपतमा समेत कमी आयो, यसले राजस्व सङ्कलनमा समेत केही कमी देखिएको छ”, प्रमुख कर अधिकृत पन्थीले भने।
लक्ष्यअनुसार राजस्व सङ्कलनमा केही कम देखिए पनि देशैभरिका राजस्व कार्यालयको तुलनामा यस कार्यालयको अवस्था भने राम्रो रहेको उनको भनाइ थियो ।
आर्थिक वर्ष २०७८/७९ को तुलनामा गत आर्थिक वर्षमा बढी राजस्व सङ्कलन भएको छ । आर्थिक वर्ष २०७८/७९ मा २४ अर्ब ११ करोड १२ लाख एक हजार राजस्व सङ्कलन भएकामा गत आर्थिक वर्षमा दुई अर्ब २० करोड ७२ हजार राजस्व बढी सङ्कलन भएको थियो ।
प्रतिक्रिया दिनुहोस्