सिंहदरबार संवाददाता
काठमाडौं। नेकपा(एकीकृत समाजवादी)का अध्यक्ष एवं पूर्वप्रधानमन्त्री माधवकुमार नेपालले भ्रष्टहरुलाई कहिँ गए पनि छाड्न नहुने बताएका छन् । नक्कली भूटानी शरणार्थी प्रकरणमा जोडिएकालाई हेरेपछि देशलाई भ्रष्टाचारले कसरी गाँजेको छ भन्ने कहाली लाग्दो तथ्य उजागर भएको बताउँदै उनले भ्रष्टहरुलाई कारवाहीको दायरामा ल्याएरै छाड्ने बताएका हुन् ।
ठमाडौंमा आयोजित निर्मल लामा स्मृति प्रतिष्ठानको कार्यक्रमलाई सम्बोधन गर्दै उनले अहिले भ्रष्टाचारका फाइलहरु खोलिन थालेको भन्दै नेताहरु कति मात्रामा भ्रष्ट भएका रहेछन् भन्नेकुरा देखिएको बताए । उनले भने, ‘उपप्रधान एवं गृहमन्त्रीको ध्यान आकर्षण गर्दछु, तपाईले खुट्टा कमाउनु हुँदैन, दृढताका साथ अघि बढ्नुस् । जुनसुकै व्यक्तिहरु जुनसुकै केसमा मुछिएका छन् भने बाँकी नराख्नुस् । नेपालको प्रतिष्ठामा आँच आउने खतरा भएको छ।’
उनले भने, ‘नेपालको राजनीतिको भविष्य भनेर चिन्ता लागेर आउँछ । यी सबै प्रश्नको जवाफ एकपछि अर्को सबै भ्रष्टाचारका काण्डहरुका फाइल खुल्न थालेका छन्, यसले देखाउँछ की नेताहरु कति मात्रामा भ्रष्ट भएका रहेछन् । हाम्रो देशको राजनीति कुन तहसम्म गिरिसकेको रहेछ ? मानव तस्करी गर्ने काममा नेताहरुले नै अगुवाइ गर्ने गरेका छन् ।’ उनले सामाजिक सञ्जालको लहडका आधारमा नेता मान्ने क्रम बढेर नेताहरुको त्याग र तपस्या गरेका नेताहरुलाई भुल्ने गरिएकोमा दुखेसो पनि पोखे ।
प्रतिक्रिया दिनुहोस्