दोहोरो अंकले बढेको सेयर बजारमा कुन-कुन कम्पनीका लगानीकर्ताले कमाए मनग्य?

काठमाडौं । साताको दोस्रो कारोबारको दिन सेयर बजारमा दोहोरो अंकको सुधार देखिएको छ । गत साताको बुधबारदेखि निरन्तर रुपमा घटेको सेयर बजार यसदिन भने दोहोरो अंकले सुधार भएको हो ।

दोहोरो अंकले बढेको सेयर बजारमा ३ कम्पनीको लगानीकर्ताहरुले सर्वाधिक कमाएका छन् । यसदिन सुपर माई हाइड्रोवापर, एशियान हाइड्रोपावर र कालिन्चोक दर्शन कम्पनीका लगानीकर्ताहरुले मनग्य आम्दानी गरेका हुन्।

यसदिन सुपर माई हाइड्रोपार कम्पनीको सेयर मूल्य १० प्रतिशतले बढेर ३९१ रुपैयाँबाट बढेर ४३० रुपैयाँ १० पैसा पुगेको छ । त्यसैगरी एशियान हाइड्रोपावर कम्पनीको सेयर मूल्य ३६८ रुपैयाँ ६० पैसाबाट बढेर ३९७ रुपैयाँ ५० पैसा र कालिन्चोक दर्शन कम्पनीको १४८ रुपैयाँ १० पैसाबाट बढेर १६२ रुपैयाँ ९० पैसा पुगेको हो । साथै, अजोड इनस्यारेन्स कम्पनीको सेयर मूल्य ८.३० र लक्ष्मी लघुवित्तको सेयर मूल्य ५.५२ प्रतिशतले बढेको छ । भने, बाँकी कम्पनीको सेयर मूल्य ५ प्रतिशत भन्दा कमले बढेको छ ।

नेपाल स्टक एक्सचेन्ज (नेप्से) परिसूचक सोमबार १७.७० अंकले बढेर १,९०६ को विन्दुमा पुगेको छ । भने, ठुला कम्पनीको सेयर मापक सेन्सेटिभ इण्डेक्स २.०४ अंकले बढेर ३५८.०३ को विन्दुमा बन्द भएको छ ।

दिनभरीमा २६१ कम्पनीको ४३ लाख ८ हजार ६४५ कित्ता सेयर १ अर्ब ३८ करोड २७ लाख रुपैयाँमा खरिदबिक्री भए । अघिल्लो कारोबारको दिन अर्थात आइतबार नेप्से परिसूचक २६.८५ अंकले घट्दा १ अर्ब २८ करोड ९३ लाख रुपैयाँ बराबरको सेयर खरिदबिक्री भएको थियो । यसदिन नेप्सेसँगै कारोबार रकममा पनि सुधार देखिएको छ ।

नेप्सेका अनुसार कारोबारमा आएको १६७ कम्पनीको सेयर मूल्य बढेको छ । ४४ कम्पनीको सेयर मूल्य घटेको छ भने ४ कम्पनीको सेयर मूल्य स्थिर छ ।

कारोबार रकमको आधारमा हिमालयन डिस्टिलरी शीर्ष स्थानमा छ । कम्पनीको ५ करोड ९० लाखभन्दा बढीको सेयर खरिदबिक्री भएको हो । त्यसैगरी, जीवन विकास लघुवित्त वित्तीय संस्थको ४ करोड ७० लाख, नबील बैंकको ४ करोड ४ लाख, एनआईसी एशिया बैंकको ३ करोड ९५ लाख र शिव श्री हाइड्रोपावर कम्पनीको ३ करोड ९१ लाख रुपैयाँ बराबरको सेयर खरिदबिक्री भएएको छ । भने, बाँकी कम्पनीको ४ करोड भन्दा कम सेयर कारोबार भएको छ ।

यसदिन नेशनल माइक्रोफाइनान्सको सेयर नकारात्मक सर्किट लेभलमा कारोबार भएको छ। कम्पनीको सेयर १० प्रतिशतले घटेर १ हजार ५०४ रुपैयाँबाट  १ हजार ३८१ रुपैयाँ ५० पैसामा झरेको हो ।

१३ उपसमूहमध्ये यस दिन १२ उपसमूहको परिसूचक बढेको छ भने एक उपसमूहको परिसूचक घटेको छ। यस दिन विकास बैंक, वित्त, जीवन बीमा र उत्पादन तथा प्रशोधन उपसमूहको परिसूचक २ प्रतिशतभन्दा बढी बढेको छ भने होटल तथा पर्यटन, जलविद्युत, निर्जीवन बीमा, अन्य र व्यापार उपसमूहको परिसूचक १ प्रतिशतभन्दा बढी बढेको छ। कारोबारमा आएको लघुवित्त उपसमूहको परिसूचक घटेको हो।