जीवन बीमा कम्पनीले २० प्रतिशत लगानी पूर्वाधारमा गर्नै पर्ने, २० अर्ब लगानी थपिने

काठमाडौं । अब जीवन बीमा कम्पनीहरुले पूर्वाधारका क्षेत्रमा २० प्रतिशत लगानी गर्नै पर्ने भएको छ । बीमा समितिले फागुन ९ गते आइतबारका दिन पत्र लेखेर जीवन बीमा कम्पनीहरुलाई पूर्वाधारका क्षेत्रमा २० प्रतिशत लगानी गर्न भनेको हो ।

बीमकको लगानी निर्देशिका, २०७५ मा बीमा कम्पनीहरुले २० प्रतिशत लगानी कृषि, पर्यटन र उर्जामा गर्नुपर्ने व्यवस्था गरेको छ ।
कम्पनीहरुले कुल टेक्निकल रिजर्भको २० प्रतिशतसम्म पूर्वाधार क्षेत्रमा लगानी गर्नुपर्ने व्यवस्था अघि सारिएको भएपनि हालसम्म एकाध कम्पनीले सिमित मात्रामा मात्रै लगानी गरेका छन् ।

‘पूर्वाधारका क्षेत्रमा लगानी गर्नुस् भनेको दुई वर्ष पुगिसक्दा पनि अधिकांशले टेरेका रहेनछन्, अब पूर्वाधारमा लगानी गरेनन् भने अन्त पनि लगानी गर्न दिँदैनौं’, बीमा समितिका अध्यक्ष सुर्य प्रसाद सिलवालले सिंहदरबारसँग भने । समितिले पहिलो चरणमा जीवन बीमा कम्पनीहरुलाई तोकिएको क्षेत्रमा तत्काल लगानी गर्न निर्देशन दिएको र केहि समयभित्रै निर्जीवन बीमा कम्पनीहरुलाई पनि त्यस्तै निर्देशन दिने बताए ।

बीमा कम्पनीहरु बैंकमा निक्षेप राखेर नाफा कमाउन पल्केको भन्दै अध्यक्ष सिलवालले अब त्यस्ता दिन सकिएको स्पष्ट पारे । ‘नागरिक लगानी कोष, कर्मचारी सञ्चय कोषहरुले पूर्वाधारमा लगानी गर्न सक्ने अनि बीमा कम्पनीले नसक्ने भन्ने हुन्छ र ?’, अध्यक्ष सिलवालले भने । उनले बीमा कम्पनीहरुले पूर्वाधार कम्पनीहरुमा ऋण वा पुँजी लगानी गर्ने बाटो खुला रहेकाले देश बनाउने अभियानमा बीमा कम्पनीको पनि दायित्व हुने बताए ।

कति आउँछ लगानी ?
हाल १९ वटा जीवन बीमा कम्पनी छन् । तिमध्ये नयाँ जीवन बीमा कम्पनीहरुको टेक्निकल रिजर्भको आकार सानो छ । पुराना १० वटा जीवन बीमा कम्पनीहरुले भने औषतमा प्रत्येक कम्पनीले डेढ अर्ब रुपैयाँ पूर्वाधारका क्षेत्रमा लगानी गर्न सक्ने अवस्था रहेको समितिकै एक अधिकृतले बताए । ‘कम्पनी अनुसार लगानीको क्षमता फरक फरक छ तर पुराना जीवन बीमा कम्पनीहरुले औषतमा एक अर्ब ५० करोड रुपैयाँसम्म लगानी गर्न सक्छन् ।’, समितिका ति अधिकारीले भने । १० वटा जीवन बीमा कम्पनीले औषतमा डेढ अर्ब लगानी गर्दा तत्कालै २५ अर्ब रुपैयाँ लगानी थपिनेछ ।