सिंहदरबार संवाददाता
काठमाडौं । ग्लोबल आईएमई बैंकले चालु आर्थिक वर्षको तेस्रो त्रैमास अन्त्यसम्म वाणिज्य बैंकहरूमध्ये सबैभन्दा बढी ३ अर्ब ७३ करोड रूपैयाँ खुद मुनाफा गरेको छ । बैंकले सार्वजनिक गरेको ९ महिनासम्मको अपरिस्कृत वित्तीय विवरण अनुसार बैंकले अघिल्लो आवको यही अवधिको तुलनामा ४.१३ प्रतिशत बढी नाफा गरेको हो ।
ग्लोबलले अधिकांश वित्तीय परिसूचकमा सुधार गर्दा नाफाको दर पनि बढाएको हो । ग्लोबल आईएमई नेपालको सबैभन्दा ठूलो वाणिज्य बैंक हो । दोस्रो त्रैमासअन्त्य सम्म पनि सबैभन्दा बढी नाफा गर्ने वाणिज्य बैंक ग्लोबल नै थियो ।
आव २०७७/७८ को चैत मसान्तसम्म बैंकले ३ अर्ब ५७ करोड ८२ लाख रुपैयाँ मुनाफा आर्जन गरेको थियो ।
बैंकले यो ९ महिनामा करिब पौन ३ अर्ब रूपैयाँभन्दा बढी गर्नुको मुख्य कारण हो, खुद ब्याज आम्दानी बढाउनु । यसबीचमा बैंकको खुद सञ्चालन मुनाफा बढेर ५ अर्ब १७ करोड ५६ लाख रुपैयाँ कायम भएको छ ।
जसको कारण हो, खुद ब्याज आम्दानी ६ अर्ब ८७ करोड २ लाखबाट उल्लेख्य सुधार भइ ७ अर्ब ४३ करोड ९७ लाख रुपैयाँ पुर्याउन बैंक सफल हुनु ।
खुद मुनाफामा उल्लेख्य उपलब्धि हासिल गरेको बैंकको वितरणयोग्य नाफा १ अर्ब ९१ करोड ९१ लाख रुपैयाँ पुगेको छ ।
९ महिनामा बैंकले १३.८ प्रतिशतले कर्जा विस्तार गरेर २ खर्ब ६० अर्ब रूपैयाँ पुर्याएको छ । यसबीचमा निक्षेप सामान्य दरले बढेर २ खर्ब ६९ अर्ब ८ करोड २८ लाख रुपैयाँ कायम भएको वित्तीय विवरणले देखाउँछ ।
२३ अर्ब ७९ करोड ५७ लाख रुपैयाँ चुक्तापुँजी भएको ग्लोबलले रिर्जभमा ९ अर्ब ८४ करोड ७४ लाख रुपैयाँ राखेको छ ।
नाफा बढेपनि बैंकको चैत मसान्तसम्म बैंकको प्रतिसेयर आम्दानी १.१७ रूपैयाँले घटेर २०.८८ रुपैयाँ कायम भएको छ । यस्तै प्रतिसेयर नेटवर्थ १४९.४५ रुपैयाँ पुगेको बैंकले जनाएको छ ।
प्रतिक्रिया दिनुहोस्