सिंहदरबार संवाददाता
नेपाल राष्ट्र बैंकका गर्भनर महाप्रसाद अधिकारीले विगत छ/सात महिनामा मुलुकमा विप्रेषण वृद्धि कम र आयात अत्यधिक भएका कारण आर्थिक समस्या उत्पन्न भएको बताएका छन् ।
प्रदेश १ सरकारले आयोजना गरेको आर्थिक सम्मेलनमाउनले ठूला उद्योगी र व्यापारीलाई कर्जा लिन केही समस्या भएको महसुस भएको चर्चा गर्दै बजार सहज होस् भन्नका लागि राष्ट्र बैंकको ३२६ अर्ब रकम बैंकलाई चलाउन दिएको जानकारी दिए । उनले अर्थतन्त्रमा उतारचढावका समयमा उद्योगी र व्यापारीलाई सरकारलाई सहयोग गर्न आग्रह गरे ।
अर्थसचिव मधु मरासिनीले पुँजीगत खर्च केही कम भए पनि समग्रमा ४० प्रतिशत खर्च भएको जानकारी दिँदै नेपाली बजारको ठूलो क्रेता भनेको नेपाल सरकार नै हो भने । उनले आगामी असार मसान्तसम्म अर्थतन्त्रमा केही उतारचढाव भए पनि समस्याग्रस्त भने नहुने विश्वास दिलाए ।
विराटनगर महानगरपालिकाका प्रमुख भीम पराजुलीले यस क्षेत्रमा औद्योगिक ग्राम स्थापना भए नागरिकको आयआर्जन वृद्धि हुनाले यसका आवश्यक सहयोग गर्ने प्रतिबद्धता व्यक्त गरे । नेपाल पर्यटन बोर्डका कार्यकारी अधिकृत धनञ्जय रेग्मी, प्रदेश लगानी बोर्डका कार्यकारी अधिकृत सरोज कोइराला, पूर्वअर्थसचिव रामेश्वर खनालले भारतीय पर्यटकलाई यस क्षेत्रमा आकर्षण गर्नुपर्नेमा जोड दिए ।
नेपाल उद्योग वाणिज्य महासङ्घका अध्यक्ष शेखर गोल्छा, नेपाल उद्योग परिसङ्घका अध्यक्ष विष्णु अग्रवाल र उद्योग सङ्गठनका अध्यक्ष सुयश प्याकुरेलले भारत र बङ्गलादेशको उपभोक्तालाई ध्यानमा राखी औद्योगिक उत्पादन र पर्यटन क्षेत्र प्रवद्र्धन गर्नुपर्नेमा जोड दिए ।
प्रतिक्रिया दिनुहोस्