काठमाडौं । अमेरिकाद्वारा मध्य अमेरिकी निर्यातमाथि गरिएको भन्सार शुल्क अनुचित मात्र नभई क्षेत्रीय अर्थतन्त्रका लागि गम्भीर चुनौती बन्ने एक प्रतिष्ठित अर्थशास्त्रीले चेतावनी दिएका छन् ।
फाउन्डेशन फर द डेभलपमेन्ट अफ सेन्ट्रल अमेरिकाका अध्यक्ष डा. ओस्कार काब्रेराले यस कदमका कारण कृषि तथा वस्त्रजस्ता प्रमुख निर्यात क्षेत्रहरूमा प्रतिकूल असर पर्न सक्ने बताए ।
जसले गर्दा सम्पूर्ण क्षेत्रको निर्यातमा करिब एक–दुई प्रतिशतको गिरावट आउने सम्भावना रहेको छ । उनले एल साल्भाडोरले मात्रै यस वर्ष करिब १०० मिलियन अमेरिकी डलर बराबरको आर्थिक क्षति व्यहोर्नुपर्ने अवस्था आउन सक्ने बताए ।
यसबाहेक, आयातमा निर्भर खाद्यान्न, औषधि तथा अन्य अत्यावश्यक वस्तुहरूको मूल्यमा वृद्धि हुने सम्भावना रहेकाले आम नागरिकको दैनिक जीवनमा थप आर्थिक दबाब सिर्जना हुन सक्ने उनको भनाइ छ।
यसले मुद्रास्फीति समेत बढ्न सक्ने संकेत गरेको छ । डा. काब्रेराले मध्य अमेरिकी राष्ट्रहरूलाई अमेरिकी बजारमा निर्भरता घटाउँदै वैकल्पिक व्यापार साझेदारहरूको खोजी गर्न तथा दीर्घकालीन औद्योगिक नीतिहरू निर्माणमार्फत आर्थिक विविधीकरणको मार्ग अँगाल्न आग्रह गरेका छन् । “हामीले छोटो अवधिका व्यापारिक प्रभावको समाधान गर्दै दीर्घकालीन रूपमा उत्पादनशीलता, नवप्रवर्तन तथा उच्च मूल्य सिर्जना गर्ने औद्योगिक संरचना निर्माणतर्फ ध्यान दिन आवश्यक छ,” उनले भने ।
अमेरिकन राष्ट्रपतिमा डोनाल्ड ट्रम्प विजयी भएपछि उनले विभिन्न परिक्षण गरिरहेका छन् । ‘मेक अमेरिका ग्रेट अगेन’ को मुल नारा लिएर चुनावमा होमिएका ट्रम्प अहिले पनि सो नारालाई अघि बढाइरहेका छन् ।
राष्ट्रपति ट्रम्पले विश्वका अधिकांस देशहरुसँग व्यापार युद्धको घोषणा गरेका छन् । व्यापारमा अमेरिकालाई मात्रै नाफा हुनेगरी उनले कर दर निर्धारण गरिरहेका छन् ।
तर यसले संयुक्त राज्य अमेरिका भित्र नै मूल्य वृद्धि तथा असमानतालाई बढाइरहेको छ । विश्वका अन्य मुलुक जस्तै मध्य अमेरिकी अर्थतन्त्रमा पनि यसले असर गर्ने देखिएको हो ।
प्रतिक्रिया दिनुहोस्