काठमाडौँ । केही दिनयतादेखि काठमाडौँमा बाक्लो तुवाँलो लाग्दै आएकाले ‘भिजिबिलिटी’ कम हुँदा त्रिभुवन अन्तरराष्ट्रिय विमानस्थलमा हवाई उडान तथा अवतरण प्रभावित बन्न थालेका छन् ।
केही दिनदेखि काठमाडौँको आकाशमा बाक्लो तुवाँलो लाग्दै आएकाले ‘भिजिबिलिटी’ कम भएर ‘आइएफआर’ प्रविधिबाट उडान, अवतरण भइरहेको त्रिभुवन अन्तरराष्ट्रिय विमानस्थलका प्रमुख एवं महाप्रबन्धक जगन्नाथ निरौलाले जानकारी दिए ।
उनले भने, “बाक्लो तुवाँलोले भिजिबिलिटीमा कमी आएपछि आइएफआर प्रविधिबाट उडान-अवतरण भइरहेको छ । सोही कारणले साबिकको तुलनामा जहाजको व्यवस्थापनमा केही ढिला हुँदै आएको छ । उडान तथा अवतरण भने हालसम्म रद्द गरिएको छैन ।”
विमानस्थलमा अहिले तीन हजार मिटरको भिजिबिलिटी रहेको महाप्रबन्धक निरौलाले जानकारी दिए । उनका अनुसार बाक्लो तुवाँलोका कारण आज बुद्ध एयरका तीन माउन्टेन फ्लाइटमध्ये दुईवटा भैरहवा, एउटा जनकपुर तथा यती एयरलाइन्स र श्री एयरलाइन्सका एक–एक माउन्टेन फ्लाइट भैरहवा ‘डाइभर्ट’ भएका छन् ।
प्रदुषित हावाले जनमानसको स्वास्थ्यमा समेत गम्भिर असर पारेको छ । केहिदिन यता मानिसहरु आँखा, नाक पोल्ने समस्या बढ्न थालेको छ । विगत केही दिनदेखि नेपालको विभिन्न क्षेत्रहरुमा लागेको वन डढेलोको कारणले काठमाण्डौ उपत्यका लगायत देशको विभिन्न स्थानमा वायु प्रदूषण बढेको वातावरण विभागले जनाएको छ । वायु प्रदूषणको अन्य कारकहरुमा उद्योग कलकारखाना र सवारी साधनबाट निष्काशन हुने धुँवा, खुल्ला रुपमा फोहोर तथा कृषिजन्य अवशेष जलाउने, घरबाट निस्कने धुँवा, सडक तथा निर्माणकार्यहरुबाट उड्ने धुलो आदि रहेका छन् ।
विशेषगरी चैत्र, बैशाख र जेठ महिना डढेलो लाग्ने याम रहेको र वर्षा नभएसम्म वायु प्रदूषण उच्च रहने सक्ने सम्भावना रहेको छ । वायु प्रदूषणले मानव स्वास्थ्यमा नकारात्मक असर पार्ने र विशेष गरी बालबालिका, वृद्ध वृद्धा एवं श्वास प्रश्वास र मुटुका बिरामी, गर्भवती महिलाहरुलाई बढी प्रभाव पार्ने भएकोले यस्तो बेला विशेष सावधानी विभागले आग्रह गरेको छ । तसर्थ घर बाहिर निस्कदा मास्कको प्रयोग गरौ तथा अनावश्यक रुपमा प्रदूषण उच्च भएको समयमा घर बाहिर ननिस्कन वातावरण विभागले आग्रह गरेको छ ।
वायु गुणस्तर सूचकांक अनुसार ०-५० हुँदा राम्रो, ५१- १०० हुँदा मध्यम, १०१-१५० हुँदा संवेदनशील समूहका लागि अस्वस्थ, १५१-२०० अस्वस्थ, २०१-३०० निकै अस्वस्थ तथा ३०१ भन्दा माथि भएमा खतरनाक तह पुगेको संकेत गर्दछ । काठमाडौंमा वातावरण प्रदुषणले खतराको सिमा नाघिसकेको छ ।
प्रतिक्रिया दिनुहोस्