सिंहदरबार संवाददाता
काठमाडौं । लायन्स क्लब इन्टरनेशनल डिष्ट्रिक्ट ३२५ जे नेपालको तर्फबाट इन्टरनेसनल डाइरेक्टर इन्डोर्सीमा पिडिजी लायन डा. ध्रुब बहादुर थापाले मनोनयन दर्ता गरेका छन् ।
आइतबार काठमाडौंमा आयोजित नोमिनेसन कार्यक्रममा उनले आफ्नो उम्मेदवारी मनोनयन डिष्ट्रिक्ट गभर्नर तथा मल्टिपल ३२५ का भाईस काउन्सिल चियरपर्सन लायन मिलन थापासमक्ष प्रस्तुत गरेका हुन् । विगत २६ वर्षदेखि लायनिज्ममा सक्रिय थापा लायन वर्ष २०१५ १६ तत्कालिन डिष्ट्रिक्ट ३२५ बि १ मा गभर्नर भएका थिए । उनले आफ्नो कार्यकालमा नेपाल लायन्स फाउन्डेसनमा लिड डोनरको अवधारणा, गभर्नरको पिन सबैले लगाउने कार्यको सुरुवात, कार्यक्रमको अन्तिममा राष्ट्रिय गान बजाउने कार्यलाई अन्त्य गर्दै राष्ट्रिय गानलाई सुरुमा नै बजाउने कार्यको सुरुवात लगायत अन्य थुप्रै परिवर्तनहरु गरेका छन् ।
त्यसैगरी, डिष्ट्रिक्ट ३२५ जे को आगामी वर्षका लागि डिष्ट्रिक्ट गभर्नर पदमा हालका फस्ट भाईस डिष्ट्रिक्ट गभर्नर लायन मिलन बाबु मल्लले, फस्ट भाईस डिष्ट्रिक्ट गभर्नरमा हालका सेकेन्ड भाईस डिष्ट्रिक्ट गभर्नर लायन प्रजापती बाँस्तोलाले र सेकेन्ड भाईस डिष्ट्रिक्ट गभर्नरमा हालका चिफ एडभाईजर लायन कुश प्रसाद मल्लीले मनोनयन दर्ता गरेका छन् । उनीहरुले कन्भेन्सनका लागि गठित नोमिनेसन कमिटी चियरपर्सन आईपिडिजी लायन हरिप्रसाद मरहट्टासमक्ष मनोनयन पत्र दर्ता गरेका हुन् ।
हालका फस्ट भाईस डिष्ट्रिक्ट गभर्नर लायन मिलनबाबु मल्ल विगत १७ वर्षदेखि लायनिज्म क्षेत्रमा सक्रिय छन् । गोर्खामा जन्मिएर काठमाडौंमा कर्मथलो बनाएका सफल उद्योगी, व्यवसायी मल्ल नाडाका कोषाध्यक्ष पनि हुन् । त्यस्तै हालका सेकेन्ड भाईस डिष्ट्रिक्ट गभर्नर लायन प्रजापती बाँस्तोला विगत २६ वर्षदेखि लायनिज्म क्षेत्रमा सक्रिय छन् । पोखरामा जन्मिएका बाँस्तोला एक सफल व्यवसायी हुन् । त्यसैगरी हालका सेकेन्ड भाईस डिष्ट्रिक्ट गभर्नरका उम्मेदवार लायन कुश प्रसाद मल्ली विगत ३६ वर्षदेखि लायनिज्म क्षेत्रमा सक्रिय छन् । बुटवलमा जन्मिएर काठमाडौंमा कर्मथलो बनाएका मल्ली सफल उद्योगी तथा बैंकर हुन् ।
डिष्ट्रिक्ट ३२५ जे नेपालको तेस्रो कन्भेन्सन आगामी वैशाख ६ गते काठमाडौको राष्ट्रिय सभा गृहमा हुँदैछ । नोमिनेसन कार्यक्रममा सबै उम्मेदवारहरुले समाजसेवामा थप सक्रिय हुने प्रतिबद्धता व्यक्त गरे भने उपस्थित सबैले शुभकामना व्यक्त गरे ।
प्रतिक्रिया दिनुहोस्