डेढ अर्ब डलरको क्रिप्टोकरेन्सी चोरीमा उत्तर कोरियाको ‘लाजारस ग्रुप’ संलग्न रहको एफबिआईको दाबी   

काठमाडौं । अमेरिकी फेडरल ब्युरो अफ इन्भेस्टिगेसन (एफबिआई) ले उत्तर कोरियामाथि गत हप्ता एक अर्ब ५० करोड डलरको डिजिटल सम्पत्ति चोरी गरेको आरोप लगाएको छ ।

यो इतिहासमा सबैभन्दा ठूलो क्रिप्टो चोरी हो । “उत्तर कोरिया क्रिप्टोकरेन्सी एक्सचेन्ज, बाइबिटबाट लगभग एब अर्ब ५० करोड अमेरिकी डलर मूल्य बराबरको भर्चुअल सम्पत्ति चोरीको लागि जिम्मेवार थियो”, एफबिआईले एक सार्वजनिक सेवा घोषणामा भनेको छ ।

ब्युरोले लाजारस ग्रुप पनि भनिने ट्रेडरट्रेटर एक समूह चोरीमा सहभागी रहेको बताएको छ । “उनीहरू द्रुत गतिमा अघि बढिरहेका छन् र चोरी गरिएको केही सम्पत्तिलाई बिटकोइन र अन्य भर्चुअल सम्पत्तिमा परिवर्तन गरिसकेका छन् जुन धेरै ब्लकचेनहरूमा हजारौँ ठेगानामा फैलिएका छन्”, ब्युरोले भनेको छ, “यी सम्पत्तिहरू थप रूपमा धुलाइ गरिने र अन्ततः फिएट मुद्रामा परिवर्तन गरिने अपेक्षा गरिएको छ ।”

क्रिप्टोकरेन्सी फर्म बाइबिटका अनुसार ह्याकरहरूले १.५ अर्ब डलर (१.१ बिलियन पाउन्ड) बराबरको डिजिटल मुद्रा चोरेका थिए । जुन इतिहासकै सबैभन्दा ठूलो क्रिप्टो चोरी हुन सक्ने दाबी गरेका छन् । दुबईस्थित कम्पनीका संस्थापकले प्रयोगकर्ताहरूलाई उनीहरूको कोष “सुरक्षित” रहेको र प्रभावित मध्ये सबैलाई क्षतिपुर्ति दिने बताएका छन्। यद्यपी यो चोरीले कम्पनीलाई गम्भिर असर परेको अनुमान गरिएको छ ।
ह्याकरले यसको एथेरियम सिक्का डिजिटल वालेटबाट चोरेको बताइएको छ । एथेरियम बिटक्वाइन पछि मूल्यको आधारमा दोस्रो ठूलो क्रिप्टोकरेन्सी हो। उत्तर कोरियाली नेता किम जोङ उनको उपहास गर्ने फिल्म ‘द इन्टरभ्यु’ को बदलामा सोनी पिक्चर्समा ह्याकिङ गरेको आरोप लागेपछि लाजारस समूहले एक दशकअघि कुख्याति प्राप्त गरेको थियो । उत्तर कोरियाको साइबर–युद्ध कार्यक्रम कम्तीमा सन् १९९० को मध्यदेखि सुरु भएको हो।

सन् २०२० को अमेरिकी सैन्य प्रतिवेदन अनुसार, त्यसबेला देखि यो छ हजार जना सदस्य भएको साइबर–युद्ध एकाइ बनेको छ जसलाई ब्युरो-१२१ भनिन्छ र यो धेरै देशबाट सञ्चालन हुन्छ ।

इतिहासमै सबैभन्दा ठूलो क्रिप्टोकरेन्सी चोरी, ह्याकरले चोर्यो डेढ अर्ब डलरको क्रिप्टो