सिंहदरबार संवाददाता
काठमाडौं । जीवन विकास लघुवित्तमा पहिलो दिन नै तीन गुणा बढी आवेदकको आवेदन परेको छ । शुक्रबारदेखि खुलेको जीवन विकास वित्तीय संस्थाको आईपीओमा साँझ ५ बजेसम्म ६ लाख ६ हजार जनाले आवेदन दिएका हुन् ।
सीडीएससीका अनुसार ६ लाख ६ हजार ८ सय ४४ जनाले ९४ लाख ७१ हजार २ सय ४० कित्ता सेयरका लागि आवेदन दिएका हुन् । यो माग कम्पनीले बाँड्ने १९ लाख ७७ हजारभन्दा करिब ५ गुणा बढी हो ।
कम्पनीको सेयर १०–१० कित्ताका दरले १ लाख ९० हजार जनाले पाउनेछन् ।
कम्पनीले प्रति कित्ता एक सय रुपैयाँ मूल्य अंकित १९ लाख ७७ हजार ३ सय कित्ता बराबरको १९ करोड ७७ लाख ३० हजार मूल्यको आईपीओ बिक्री खुला गरेको हो । सेयरमा असार १५ गतेसम्म आवेदन दिन सकिन्छ।
नेपाल धितोपत्र बोर्डले कम्पनीलाई जेठ ३० गते आईपीओ निष्काशन गर्ने अनुमति दिएको थियो । कम्पनीको आईपीओ निष्काशन तथा बिक्री प्रबन्धक एनएमबि क्यापिटल हो ।
यो आईपीओलाई इक्रा नेपालले ‘इक्रा आइआर बीबीबी माइनस’ रेटिङ प्रदान गरेको छ । ४१ करोड ६ लाख ७० हजार रुपैयाँ चुक्ता पुँजी रहेको कम्पनीले पुँजीको ३२.५० प्रतिशत आईपिओ निष्काशन गरेको हो ।
आईपिओ निष्काशनपछि संस्थाको चुक्ता पुँजी ६० करोड ३७ लाख ४० हजार रुपैयाँ पुग्ने छ । संस्थाको जगेडा कोषमा १ अर्ब १८ करोड ३९ लाख रुपैयाँ रहेको छ ।
कुल निष्काशनमध्ये ३० हजार ४२० कित्ता कर्मचारीलाई र ९८ हजार ८६५ कित्ता सामूहिक लगानी कोषलाई छुट्याइएको छ। बाँकी रहेको १८ लाख ४८ हजार १५ कित्तामा सर्वसाधारणले आवेदन दिन सकिन्छ । न्युनतम १० कित्तादेखि अधिकतम एक हजार कित्तासम्म आवेदन दिन सकिन्छ ।
प्रतिक्रिया दिनुहोस्