सिंहदरबार संवाददाता
काठमाडौं । नेपाल सरकारका उपप्रधानमन्त्री एवं अर्थमन्त्री विष्णुप्रसाद पौडेलले सार्वभौम क्रेडिट रेटिङ्गको बीबी माइनसमा चित्त बुझाएर नबस्ने बताएका छन् । सार्वभौम क्रेडिट रेटिङ्ग सार्वजनिक भएपछि अर्थमन्त्रालयमा भएको पत्रकार भेटघाटको कार्यक्रममा मन्त्री पौडेलको यस्तो अभिव्यक्ती आएको हो ।
कार्यक्रममा अर्थमन्त्री पौडेलले भने ‘हामी आज खुशी बाड्ने अवस्थामा छौं । बीबी माइनस रिजल्ट आएको छ यो दक्षिण एसियाको स्थितिमा निकै अनुकुल हो । तर पनि हामी बिबि माइनस रेटिङमा मात्रै चित्त बुझाएर बस्दैनौं यसमा थप काम हुन्छ । ’ नेपालको रेटिङमा महत्त्वपूर्ण भुमिका खेल्ने फिच रेटिङ देखि सबैलाई धन्यवाद दिँदै मन्त्री पौडेलले भने ‘यो रेटिङ सुरुवात मात्रै हो । आउने दिनमा यसको निरन्तरता हुन्छ । रेटिङ बाट नेपाल साच्चिकै लगानीका लागि राम्रो देश भएको पुष्टि भएको छ । यसले नेपालमा लगानीका लागि प्रोत्साहन हुनेमा म बिस्वस्त छु । ’
सार्वभौम क्रेडिट रेटिङ्गको रिजल्टलाई इङ्कति गदै पौडेलले भने ‘ नेपालमा लगानी गरेपछी प्रतिफल पक्कै पनि पाइन्छ भन्ने सन्देश रेटिङ्गले दिएको छ । यसकाट विदेशी लगानी प्रोत्साहन हुन्छ त्यसमा थप उत्साह बढाउन आवश्यक कानूनहरु सुधार गर्नका लागि हामी तत्पर छौँ ।’
नेपालले सार्वभौम क्रेडिट रेटिङ्गमा बीबी माइनस स्कोर प्राप्त गरेकाे छ । नेपालले प्राप्त गरेको रेटिङ्गले नेपालको अर्थतन्त्रको संरचना, सार्वजनिक वित्त परिचालन र समष्टिगत आर्थिक तथा वित्तीय अवस्था लगानी मैत्री र उन्नत रहेको संकेत गरेको छ । क्रेडिट रेटिङ्गको नतिजाले नेपालको साख क्षमता ( क्रेडिट वर्थनेस ) उच्च रहेको, वित्तीय तथा आर्थिक क्षमता सवल रहेको र अन्तर्राष्ट्रिय वजारबाट ऋण लिनु पर्दा न्यून व्याजदरमा ऋण प्राप्त गर्न सक्ने अवस्था सिर्जना गरेको छ । यसले निजी क्षेत्रको विश्वास अभिवृद्धि गर्न र वैदेशिक लगानी आकर्षित गर्न समेत सहयोग पुग्ने देखिन्छ ।
केहाे क्रेडिट रेटिङ्ग ?
क्रेडिट रेटिङ्गले अर्थतन्त्रका चार क्षेत्रहरु क. अर्थतन्त्रको संरचनगत पक्ष , ख. समष्टिगत आर्थिक उपलब्धी, ग. सार्वजनिक वित्त घ. वाह्य क्षेत्रका आर्थिक परिसुचकको विस्तृत रुपमा लेखाजोखा गर्ने गरिन्छ । मुलुकको सार्वभौम क्रेडिट रेटिङ्ग गर्दा यस्ता पक्षहरुलाई विभिन्न सार्वभौम रेटिङ्ग मोडल (साेभर्न रेटिङ्ग माेडल) र गुणात्मक मापन (क्वालिटेटिभ ओभरले ) विधीवाट स्वतन्त्र रुपमा मूल्यांकन गरी प्राप्त स्कोरलाई न्यूनतम डी देखि अधिकतम एएए सम्म रेटिङ्ग प्रदान गर्ने गरिन्छ । एएए ले मुलुकको हाइ क्रेडिट क्वालिटी रहेको देखाउँदछ भने डी ले डीफल्टकाे अवस्थालाई ईंगित गर्दछ ।
नेपालमा कसरी गरियाे ?
नेपालमा फीच रेटिङ्ग लिमिटेडले नेपालको आर्थिक संरचना, सार्वजनिक वित्तको अवस्था, आन्तरिक तथा वैदेशिक ऋणको अवस्था, मौद्रिक तथा वित्तीय क्षेत्रका सूचकहरुको अवस्था, वाह्य क्षेत्रका आर्थिक परिसुचकहरु, सोह्रौं योजनाले परिलक्षित गरेका आर्थिक वृद्धिको मध्यकालिन तथा दीर्घकालिन खाका लगायतका विवरण र तथ्यांकको विश्लेषण गरेको थियो ।
यसका साथै गुणात्मक मूल्यांकनको चरण अन्तर्गत फीच रेटिङ्ग लिमिटेडको विज्ञ समूहवाट सेक्टेम्बर २०२४ मा नेपालको स्थलगत भ्रमण गरी प्रधानमन्त्री तथा मन्त्रिपरिषद्को कार्यालय, अर्थ मन्त्रालय, राष्ट्रिय योजना आयोग, नेपाल राष्ट्र बैंक लगायतका सरकारी निकायका उच्च पदाधिकारहरुसँग परामर्श र छलफल गरेको थियो । त्यस्तै निजी क्षेत्र र नेपाल स्थित द्विपक्षिय तथा वहुपक्षिय विकास साझेदार निकायका अधिकारीहरुसँग समेत परामर्श गरेको थियो । नेपालले प्रस्तुत गरेको पुर्वाधार विकासको मध्यकालिन र दीर्घकालिन योजनाको कार्यान्वयनको मुल्यांकन गर्न नमुनाको रुपमा नागढुंगा सुरुङ्ग मार्गको अवलोकन समेत गरेको थियो ।
नेपाललाइ के फाइदा हुन्छ ?
सार्वभौम क्रेडिट रेटिङ्गलाई विश्वका लगानीकर्ता तथा वित्तीय सेवा प्रदान गर्ने निकायले कुनै पनि मुलुकको लगानीको वातावरण मुल्यांकनको आधारको रुपमा लिने गर्दछन् । यसले मुलकको अर्थतन्त्रको संरचना र अवस्थालाई स्वतन्त्र विज्ञको आँखावाट मूल्यांकन गरी यथार्थ अवस्थालाई विश्वभरका लगानीकर्ता समझ पुयाउने गर्दछ ।
यस अर्थमा सार्वभौम क्रेडिट रेटिङ्गलाई मुलुकले आफ्नो अर्थतन्त्रलाई विश्वसामु खुलारुपमा मुल्यांकन गराई पारदर्शिता कायम गरेको रुपमा समेत लिन सकिन्छ । नेपालको सार्वभौम क्रेडिट रेटिङ्गले नेपालको अर्थतन्त्रलाई अन्तर्राष्ट्रिय समुदायसम्म प्रस्तुत गरेको छ ।
सार्वभौम क्रेडिट रेटिङ्ग विगतका तथ्यांक विश्लेषणको नतिजा मात्र नभएर भविश्यपरक दृष्टिकोण समेत हो । यसले अर्थतन्त्रको भावि दिशा र संभावनाको आंकलन गर्दै मुलुकले भविश्यमा आफ्नो ऋण दायित्व पुर्णरुपमा र समयमै भुक्तानी गर्न सक्ने क्षमताको मापन गर्दछ ।
क्रेडिट रेटिङ्गमा नेपालकाे अबस्था
क्रेडिट रेटिङ्गको नतिजालाई दक्षिण एसियाली मुलुकहरुको रेटिङ्ग नतिजासँग तुलना गर्दा नेपालले प्राप्त गरेको रेटिङ्ग सन्तोषजनक रहेको छ । यसले सरकार, निजी क्षेत्र र सम्पुर्ण लगानीकर्ताहरुको लागि उत्साह सिर्जना गरेको छ । नेपाल सन् २०२६ मा अल्पविकसित राष्ट्रबाट स्तरोन्नति भई नविनतम एवं वैकल्पिक वित्तका स्रोत परिचान गर्नु पर्ने अवस्थाको पूर्व तयारीको रुपमा समेत सार्वभौम क्रेडिट रेटिङ्गलाई लिन सकिन्छ ।
नेपालको सार्वभौम क्रेडिट रेटिङ्गमा हाल प्राप्त गरेको नतिजाले नेपाल लगानीको लागि सहज वातावरण भएको स्थापित गरेकोले विदेशी लगानीकर्ताको विश्वास अभिवृद्धि हुन गई भावि दिनमा नेपालको पुर्वाधार, पर्यटन, कृषि, सेवा लगायतका क्षेत्रका ठूला आयोजनाहरुमा लगानी अभिवृद्धि हुने अपेक्षा गरिएको छ ।
प्रतिक्रिया दिनुहोस्