कतार एयरवेजले पहिलो पटक वाइडबढी जहाज गौतमबुद्ध विमानस्थलमा अवतरण गर्यो, पाँच कम्पनीले सुरु गरे सेवा

काठमाडौं । कतार एयरवेजले भैरहवास्थित गौतमबुद्ध अन्तर्राष्ट्रिय विमानस्थलबाट मंगलबारदेखि व्यावसायिक उडान सुरु गरेको छ । दोहाबाट आएको कतार एयरवेजको एयर बस ३३० आज अपराह्न उक्त विमानस्थलमा अवतरण गरेको गौतमबुद्ध विमानस्थलले जनाएको छ ।

त्रिभुवन अन्तर्राष्ट्रिय विमानस्थलका महाप्रबन्धक प्रतापबाबु तिवारीले एयर बस ३३० बाट गौतमबुद्ध विमानस्थलमा कतार एयरवेजले पहिलोपटक व्यावसायिक उडान गरेको बताए । कतार एयरवेजले अब नियमित रुपमा दोहा–भैरहवा–काठमाडौँ–दोहा ‘रुट’मा एक उडान गर्नेछ ।

उक्त विमान कम्पनीले आगामी मङ्सिर १५ गतेसम्म गौतमबुद्ध विमानस्थलमा उडानको अनुमति पाएको नेपाल नागरिक उड्डयन प्राधिकरणले जनाएको छ । कतार एयरसँगै गौतमबुद्ध विमानस्थलमा अन्तर्राष्ट्रिय उडान गर्ने वायुसेवा कम्पनीको सङ्ख्या पाँच पुगेको छ ।

यसअघि उक्त विमानस्थलमा नेपाल एयरलाइन्स, फ्लाई दुबई, थाई एयर एसिया र जजिराले सेवा प्रारम्भ गरिसकेका छन् । त्रिभुवन विमानस्थल स्तरोन्तिका लागि दैनिक १० घण्टा बन्द हुने भएपछि एयरलाइन्स कम्पनीहरुले भैरहवाबाट उडान सुरु गरेका हुन् । अर्बौ खर्चिएर निर्माण गरिएको गौतम बुद्ध अन्तर्राष्ट्रिय विमानस्थल राम्ररी संचालनमा नआउँदा सरकारको आलोचना समेत बढेको थियो ।

त्रिभुवन विमानस्थल स्तरोन्नतिको बहानामा भैरहवाको विमानस्थल संचालन गर्ने उपाय प्राधिकरणले निकालेको अनुमान समेत गरिएको छ ।