सिंहदरबार संवाददाता
बन्दीपुर केबलकार एण्ड टुरिजमले ‘तिज सप्ताहन्न उत्सव’ सुरु गरेको छ । बन्दीपुर केबलकारले भदौ १५ गतेदेखि सोे कार्यक्रम सुरु गरेको हो ।
बन्दीपुर केबलकार एण्ड टुरिजम कार्यक्रमको मुख्य व्यवस्थापनका रुपमा रहेको छ । यस अवसरमा सहभागीहरूलाई बन्दीपुरको केबलकारमा दोहोरो सवारीमा ३ सय ५० रुपैयाँमा चढ्ने व्यवस्था गरिएको छ । साथै, कार्यक्रमको सहयोगको लागि प्रतिटिकट २५ रुपैयाँ दिने केबलकार कम्पनीले घोषणा गरेको छ ।
पर्यटकीय एवं सांस्कृतिक ग्राम बन्दीपुरमा सुरु भएको सो कार्यक्रमको समुद्घाटन नेपाली फिल्म क्षेत्रका महानायक राजेश हमालले गर्ने भएका छन् । कार्यक्रम खड्गदेवी मन्दिर परिसरमा आयोजना गरिएको छ । नेपाल कै ठुलो पुरस्कार राशी राखी खुल्ला तीज गीत प्रतियोगिता, सांस्कृतिक कन्सर्ट, सांस्कृतिक झाँकी प्रदर्शनी र स्थानीय कला संस्कृतिको प्रस्तुति समेत सप्ताहन्न उत्सवको मुख्य आकर्षण रहेको बन्दीपुर केबलकारले जनाएको छ ।
कार्यक्रम उल्लासय रूपमा बन्दीपुरलाई चिनाउने गरी तयार गरिएको आयोजकले दाबी गरेको छ । पहिलो पटक बन्दीपुरका सबै सङ्घ संस्थाहरू मिलेर आयोजन गरिएको यस कार्यक्रमको संरक्षण बन्दीपुर गाउँपालिका आफैँले गरेको छ । पुरस्कारको प्रायोजन चन्द्र निर्माण सेवा, डिजाईन स्टेशन प्रालि, केज कन्सल्टेन्ट प्रालि, विज बजारलगायत कम्पनीले गरेका छन् र बन्दीपुरका सबै सङ्घ संस्थाहरू र स्थानीय बासीहरूले आर्थिक सहयोग दिने घोषणा गरेका छन् ।
उद्घाटन सत्र पछि साँझ हुने भव्य सांस्कृतिक कन्सर्टको लागि काठमाडौंबाट आएकी चर्चित गायिका रीता केसीको मूख्य प्रस्तुति र अन्य कलाकारहरू समेतको बेजोड प्रस्तुति रहने छ । प्रत्येक दिन साँझ सांस्कृतिक कार्यक्रम र दिव्य महाआरती हुने आयोजकले बताएको छ । कार्यक्रम २२ गतेसम्म निरन्तर सञ्चालन हुने कम्पनीले जनाएको छ ।
प्रतिक्रिया दिनुहोस्