सिंहदरबार संवाददाता
सिन्धुपाल्चोक । काठमाडौंबाट र्याफ्टिङका लागि अरनिको राजमार्गस्थित सिन्धुपाल्चोकको सुकुटेमा आइपुगेका ज्योति श्रेष्ठले जीवनकै महत्वपूर्ण मज्जा अनुभव गरे ।
विश्वकै उत्कृष्ट दशौँ गन्तव्यभित्र पर्ने सिन्धुपाल्चोकको सुनकोसी नदीमा शनिबार र्याफ्टिङ गर्न उनीसहित १३ जनाको जम्बो समूह शुक्रबार नै आइपुग्यो । उत्साहित हुँदै ज्योतिले भने,“हामीले सुनेका मात्रै थियौँ, र्याफ्टिङको मज्जा आफैँले लिन पायौँ । शनिबार चाप धेरै हुन्छ भन्ने सुनेर नपाइएला भन्ने निकै डर थियो ।” उनले कलेज छुट्टीको दिन मिलाएर अन्य साथीसँग फेरि आउने सोच अहिले नै बनाइसकेको बताए ।
“यति रमाइलो हुन्छ भन्ने आफैँले र्याफ्टिङ गरेपछि थाहा भयो, साथीहरु सबैलाई अनुभवबारे ‘सेयर’ गर्छौं अनि यहाँ आउनलाई प्रेरित गर्छौं”, र्याफ्टिङपछि ज्योतिसँगै उभिएका उनका साथी शैलेश श्रेष्ठले बताए । जीवनकै लागि नौलो र खतरापूर्ण खेल भएकाले यो समूह केही डराएको भने थियो । ठाडो खोलामा बगिरहेको पानीसँग खासै परिचित नभएकाले सुरुमै मुटुको गति बढेको अनुभव भएको श्रेष्ठ बताउँछन् ।
उनले आफ्नो अनुभव सुनाए,“जब र्याफ्टिङ खोलाको पानीसँगै बग्न थाल्यो, मनमा डरको गति पनि झनै बढ्यो । कहिलेकाहीँ आँखा चिम्लनुसमेत परेपछि भने बेक्कार गरिएछ भन्ने पनि लाग्यो ।” उनले साथीहरु पानीमा रमाउँदै कराउँदै गर्न थालेपछि भने बल्ल रमाइलो अनुभव भएको सुनाए । “पछि डर भुलियो, अर्कै संसारमा डुबुल्की मारिरहेको जस्तै लाग्यो”, उनले बताए । उनीहरु जस्तै भक्तपुरबाट आएका रोजिना श्रेष्ठले ‘कोर्पेटिभ’ टिम लिएर र्याफ्टिङको आनन्द लिन आएको सुनाए । उनले भने,“विदेशीसहित हाम्रो ५० जनाको टोली छ । अब गर्मी सुरु भयो, यसकै लागि बिदाको समय मिलाएर समूह बनेर आयौँ ।”
शुक्रबार र शनिबार यहाँका रिसोर्ट भरिने गरेकाले पहिल्यै बुक गरेर आएको उनले भने । रोजिनाले यसअघि पनि र्याफ्टिङ गरिसकेका थिए । त्यति बेलाको मज्जा सम्झँदै उहाँ फेरि सुनकोसी आइपुगेका हुन् । उनले भने,“पहिला धित नै मरेन, त्यसैले फेरि आएँ ।” सुकुटेमा गर्मी बढेसँगै साहसिक खेल र्याफ्टिङमा रमाउने आन्तरिक तथा बाह्य पर्यटक अहिले ह्वात्तै बढेका छन् । गएको फागुनदेखि पर्यटकको चाप बढेको रिसोर्ट सञ्चालकहरु बताउँछन् । पछिल्लो हप्तादेखि अत्यधिक गर्मी बढेका कारण र्याफ्टिङ गर्ने पर्यटकमा वृद्धि भएको हो ।
साहसिक खेल र्याफ्टिङ र क्यानोनिङ गर्ने पर्यटकको सङ्ख्या दैनिक बढिरहेकाले यहाँका सबै रिसोर्ट व्यस्त भएको सुकुटेबिच एड्भेन्जर रिसोर्टका सञ्चालक महेन्द्रसिंह थापा बताउँछन् । थापा भन्छन्, दैनिक एक सयभन्दा बढी आन्तरिक र बाह्य पर्यटक आउने गरेका छन् । यो समय र्याफ्टिङको याम भएकाले अब चाप झनै बढ्ने अनुमान छ ।” र्याफ्टिङकै लागि सिन्धुपाल्चोकमा हप्ता दिनमा कम्तीमा दुई हजार पर्यटक भित्रिने गरेका छन् । राजधानीदेखि युरोप, अमेरिकाजस्ता बाह्य मूलुकबाट आउने पर्यटकको लक्ष्य भोटेकोसी र सुनकोसीमा र्याफ्टिङ गर्ने हुने गरेको छ ।
पर्यटक बढेसँगै सिन्धुपाल्चोक र काभ्रेको सीमा गाउँ बन्देउदेखि रिसोर्टको सङ्ख्यामा समेत वृद्धि भएको छ । सुनकोसी र भोटेकोसी किनारामा र्याफ्टिङ सञ्चालन गर्ने रिसोर्ट बढेका छन् ।
प्रतिक्रिया दिनुहोस्