मारवाडी सेवा समिति नेपालले १९औं एसियन गेम्स २०२३ मा उत्कृष्ट प्रदर्शन गर्ने राष्ट्रिय खेलाडीहरुलाई सम्मान गरेको छ । १९ औं एसियाली खेलकुदमा पुरुष क्रिकेटतर्फ नेपाली खेलाडीहरुले एउटै म्याचमा अति नै दुर्लभ ५ वटा विश्व किर्तिमान बनाएका थिए । ति खेडालीहरुलाई समितिले सम्मान गरेको हो ।
समितिले ९ बलमा अर्ध शतक बनाई विश्व किर्तिमान बनाउन सफल दिपेन्द्र सिंह ऐरी र ३४ बलमा शतक बनाई विश्व किर्तिमान बनाउन सफल कुशल मल्ललाई नगद एक एक लाखसहित सम्मान गरेको हो । साथै कराँते खेलतर्फ नेपाललाई रजत पदक दिलाएकी एरिका गुरुङलाई पनि एक लाख एक हजार नगदसहित सम्मान पत्र प्रदान गरी सम्मान गरेको छ ।
नेपाल क्रिकेट संघ र राष्ट्रिय क्रिकेट टिमका सम्पूर्ण खेलाडीहरुलाई सम्मान पत्रका साथै टोकन अफ लभद्वारा सम्मान गरिएको थियो । कार्यक्रममा मारवाडी समाजका सदस्यहरु एवं नेपाल राष्ट्रिय क्रिकेट टिमका पूर्व कप्तान पवन अग्रवाल र पूर्व क्रिकेटर पारस लुनियालाई पनि सम्मान गरिएको थियो । मारवाडी समुदायका विभिन्न संघ संस्थाहरुले मिलेर हरेक वर्ष दिपावली स्नेह मिलन समारोह मनाउँदै आइरहेका छन् र यसपाली पनि सोही समारोहमा खेलाडीहरुलाई सम्मान गरिएको हो ।
कार्यक्रम मारवाडी सेवा समिति नेपाल, पशुपति गौशाला धर्मशाला, मारवाडी सेवा ग्राम गौधाम (धार्के) मारवाडी महिला मंच र मारवाडी युवा मंच लगायतले संयुक्त रुपले आयोजना गरेका थिए । मारवाडी सेवा समिति नेपालका अध्यक्ष कैलाशचन्द्र गोयलले जाजरकोट र पश्चिम रुकुममा केहि दिन अघि गएको भूकम्पमा परी ठूलो जनधनको क्षती भएकोमा दुःख व्यक्त गर्दै पहिलो चरणमा फाइबरको सिरक ८३५ थान, पि. फम मेट ९०० थान र दाल १ केजी र नुन १ केजी राखेर प्याक गरिएको ४०० प्याकेट चामल सहयोग उपलब्ध गराईसकेको बताए । उनले थप सहयोगको तयारी पनि गरिरहेको जानकारी गराएका थिए ।
कार्यक्रममा नेपाल राष्ट्रिय मारवाडी परिषद्का अध्यक्ष पवन मित्तल, मारवाडी महिला मंचकी अध्यक्ष श्रीमती अर्चना काबरा, मारवाडी युवा मंचका अध्यक्ष शैलेन्द्र शर्माले शुभकामना दिएका थिए ।
प्रतिक्रिया दिनुहोस्