काठमाडौं रिलायन्स लाइफ इन्स्योरेन्स कम्पनीको बीमा शुल्क १३२.९१ प्रतिशतले बढेको छ । २०७६ चैत मसान्त अवधीमा ७९ करोड रुपैयाँ बीमा शुल्क आर्जन गरेको कम्पनीले २०७७ चैत मसान्त अवधीमा एक अर्ब ८४ करोड रुपैयाँ संकलन गरेको हो ।
कम्पनीको जीवन बीमा कोषको आकार पनि १६२.७९ प्रतिशतले बढेको छ । गत चैत मसान्त अवधीमा ८६ करोड रुपैयाँ जीवन बीमा कोषमा थियो, यसपाली सो कोषको आकार २ अर्ब २६ करोड रुपैयाँ पुगेको छ ।
दुई अर्ब १० करोेड रुपैयाँ चुक्ता पुँजी रहेको कम्पनीको जगेडा तथा कोषमा २० करोड छ । कम्पनीले दीर्घकालिन लगानी तथा कर्जामा एक अर्ब ९१ करोड लगानी गरेको छ । गत चैत मसान्त अवधीमा त्यस्तो लगानी एक अर्ब २ करोेड रुपैयाँ मात्रै थियो ।
रिलायन्सले बीमालेख धितोमा २० करोड रुपैयाँ कर्जा प्रवाह गरेको छ । कम्पनीले १२ हजार एक सय २० वटा बीमालेख जारी गरेर हालसम्म ४ अर्ब १४ करोड रुपैयाँ भन्दा बढी बीमाशुल्क आर्जन गरेको छ ।
रिलायन्सले हालसम्म १४२ वटा दावी वापत २३ करोड ६४ रुपैयाँ भुक्तानी गरेको छ । कम्पनीको प्रति सेयर आम्दानी ४.१८ रुपैयाँ छ भने प्रति सेयर नेटवर्थ ११०.८८ रुपैयाँ रहेको छ ।
कम्पनीले चालु आवको नौ महिनामा ६ करोड ५८ लाख रुपैयाँ खुद नाफा कमाएको छ । गत आर्थिक वर्षको सोही अवधिको तुलनामा खुद नाफा ७ दशमलव २८ प्रतिशतले बढी हो । गत आर्थिक वर्षको सोही अवधिसम्ममा कम्पनीले ६ करोड १३ लाख रुपैयाँ खुद नाफा कमाएको थियो । यद्यपी यो नाफा बीमांकीय मूल्यांकन अघिको हो ।
नयाँ जीवन बीमा कम्पनीहरुमध्ये सबै भन्दा पहिले आईपीओ जारी गरेको रिलायन्सको समग्र वित्तिय विवरणले कम्पनी दिगो प्रतिफल दिने बाटोमा अघि बढेको देखिन्छ ।
प्रतिक्रिया दिनुहोस्