काठमाडौं । नेपाली कांग्रेसका सभापति शेरबहादुर देउवाले महामानव बिपी कोइरालाको सन्दर्भमा अहिले पनि व्यापक अध्ययन र अनुसन्धान हुनुपर्ने आवश्यकता औँल्याएका छन् ।
बिपी कोइरालाको एक सय ११औं जन्मजयन्तीका अवसरमा पेसागत तथा बुद्धिजीवी विभाग, नेपाली कांगेसले आज आयोजना गरेको ‘बिपीको समाजवाद : आजको सान्दर्भिकता’ विषयक विचार गोष्ठीमा पूर्वप्रधानमन्त्री देउवाले बिपी कोइरालाले कुनै समयमा बोलेको विषय समयानुकूल परिवर्तन हुँदै जाने बताउँदै बिपीका बारेमा समयअनुसार खोज अनुसन्धान गरी त्यसलाई विश्वसामु पुर्याउनुपर्ने बताएका हुन् ।
बिपी कोइरालाले छोडेको प्रजातान्त्रिक पद्धति र प्रजातान्त्रिक समाजवादलगायत विषयलाई आत्मसात् गर्दै अबका युवा पुस्ताहरु अगाडि बढ्नुपर्ने उनको भनाइ थियो । सभापति देउवाले भने ‘समाजवाद मात्र होइन, प्रजातन्त्रसहितको समाजवाद हो, जसमा मानवीय मूल्य, मान्यता, मानवअधिकार सबैभन्दा महत्त्वपूर्ण कुरा हो ।’ प्रजातन्त्रविहीन समाजवाद हुन नसक्ने उनको भनाइ थियो ।
‘कतिपय कुराहरु समयअनुसार परिवर्तन पनि हुन्छ, उतिबेला बिपी कोइरालाले गाई पाल्ने कुरा गरेका थिए उतिबेला बाटो थिएन, तर अहिले गाउँका घरघरमा बाटो पुगेको छ, बिजुली पुगेको छ, बत्ती पुगेको छ, त्यसैले आजको दिनमा गाई पाल्नेभन्दा पनि डेरीबाट दूध वितरण गर्न सकिन्छ, डेरीबाटै घीउ उपलब्ध गराउन सकिन्छ’, उनले भने ।
बिपी कोइराला हरेक विषयको ज्ञाता भएको बताउँदै उनले राजनीतिसँगै बिपीले नेपाली साहित्यको क्षेत्रमा समेत अतुलनीय योगदान पुर्याएको टिप्पणी गरे । ‘बिपी कोइराला साहित्यमा पनि उत्तिकै दक्खल भएको व्यक्ति हो, नेपालमा उनी जत्तिको साहित्यकार विरलै पाइन्छ, राजनीतिमा त पूरै दक्खल भएको व्यक्ति हो, त्यसकारणले मैले उनलाई सानो देशको ठूलो नेता भनेको हो ।’
कांग्रेस महामन्त्री गगनकुमार थापाले बिपीको विचार अहिले पनि उत्तिकै सान्दर्भिक रहेको बताउँदै कांग्रेस पार्टीले बिपीको विचारलाई पछ्याउँदै अगाडि बढ्नुपर्ने बताए । उनले भने ‘बिपीको समाजवाद भनेको व्यक्तिको स्वतन्त्रता हो, उनी चिन्तक मात्रै होइन, पार्टीको नेता पनि हुनुहुन्थ्यो, बिपीबाट नयाँ पुस्ताले अझ बढी सिक्नुपर्छ, युवाले बिपीबारे अध्ययन गर्नुपर्ने छ ।’ महामन्त्री थापाले आजको सन्दर्भमा स्वदेशमै रोजगारी सिर्जना गरी लाखौं युवालाई रोजगारी दिँदा मात्रै बिपीको सान्दर्भिकता झल्किने बताए ।
प्रतिक्रिया दिनुहोस्