पार्टीको लागि भन्दा पनि विकासको लागि काम गर्छुः चन्द्रपुरका मेयर उम्मेदवार दाहाल (अन्तरवार्ता)

रौतहट जिल्लाको चन्द्रपुर नगरपालिका पूर्वपश्चिम राजमार्गले छोएको मधेस प्रदेशकै प्रख्यात नगरपालिका हो । पूर्वप्रधानमन्त्री माधवकुमार नेपालको गृहजिल्ला पनि हो रौतहट । सदरमुकाम गौर नगरपालिका, मध्ये रौतहटमा पर्ने व्यापारिक क्षेत्र गरुडा नगरपालिका भन्दा चन्द्रपुरले छुट्टै पहिचान बनाएको छ ।

स्थानीय निकायको निर्वाचन नजिकिंदै गर्दा चन्द्रपुरको नतिजा कस्तो आउला भनेर चासोका साथ हेरिएको छ । यो नगरमा कोही कसैसँग गठबन्धन भएको छ । सबै एक्लाएक्लै मित्रवत प्रतिष्पर्धा गरिरहेका छन् ।

सबैमाझ चर्चित रहेका बाबुराम दाहाल नेकपा एकीकृत समाजवादीको तर्फबाट मेयर पदको प्रतिष्पर्धामा छन् । उनै दाहालसँग गरिएको कुराकानी यहाँ प्रस्तुत छः

तपाईँले मेयर पदमा उम्मेदवारी दिनु भएको छ, तपाईँको उम्मेवादी खास के का लागि हो ?
पहिलो कुरा त हाम्रो उम्मेदवारी स्थानीय सरकारलाई हाम्रो संविधानले जसरी परिभाषित गरेको छ, सोही अनुसार कार्यान्वयन गराउनका लागि हो । न्यायपालिका, कार्यपालिका र व्यवस्थापिकाको भूमिकालाई मिलाएर लान हामीले उमेद्वारी दिएका हौं । यो चन्द्रपुर नगरपालिकालाई समृद्ध बनाउन यहाँको स्वास्थ्य, शिक्षा, कृषिको क्षेत्रमा योजनाबद्ध ढंगले काम गर्न हामी आएका हौं । हामीसँग स्पष्ट योजना भएका कारण पनि हामी हाम्रो पार्टी ‘कलम छाप’को नेतृत्व निर्वाचित हुनुपर्छ भनेर हामी लागेका छौं ।

चन्द्रपुरलाई समृद्ध बनाउने, स्वास्थ्य, शिक्षा, पर्यटन, खेलकुद लगायतका क्षेत्रको विकास गर्ने त सबै उम्मेदवार भन्नुहुन्छ, तपाईँका मुख्य योजनाहरु चाँही के–के छन् ?
हाम्रा तीन मुख्य योजनाहरु छन् । अहिले यहाँको स्वास्थ्यको अवस्था जटिल छ । भएको सरकारी अस्पतालको पनि सेवा राम्रो छैन । त्यसको सेवा सुधारका लागि मेयरको भूमिका निकै ठूलो हुन्छ । हामीले ६ महिना भित्र विशेषज्ञसहितको अस्पताल बनाउने, क्षमतावान शिक्षक सरकारी विद्यालयमा नियुक्त गर्ने, चन्द्रपुरको परिवेश अनुसार भौतिक पूर्वाधारको विकास गर्नेछौँ । वर्गीय हिसाबले गरिबकालागि पनि हामी काम गर्छौँ । यो भूमि उर्वर भूमी पनि हो । यहाँ व्यवसायिक खेती र पशुपालन सम्भव छ । त्यस्ता व्यवसायीलाई स्थानीय सरकारले सघाउन जरुरी छ । हामीले त्यहाँ दिनुपर्ने अनुदान दिन्छौं, वडा नम्बर पाँचमा भूमिगत सिँचाईको व्यवस्था गर्छौँ । सबैतिर बाग्मती सिचार्इँको पानीले काम गर्दैन । हामीले हाम्रो अधिकार क्षेत्रको राम्रो प्रयोग गर्छौँ । सुकुम्बासीहरुको व्यवस्थापन पनि हामी गर्छौं । प्रदेश र स्थानीय मात्र नभई केन्द्रीय सरकारले पनि यसमा सघाउन जरुरी छ । भूमिहीन र सुकुम्बासीले फर्म भर्नु भएको छ, उहाँहरुलाई हामीले सघाउनु छ ।

चन्द्रपुरको दशै वडाको अवस्था एकैखालको छैन, भौगोलिक, जातजाती वसोबास, धर्मसंस्कृतिको विविधता छ, तपाईँ निर्वाचित हुनु भयो भने समग्र विकास निर्माणका कामलाई के कसरी अगाडि बढाउनु हुन्छ ?
यहाँ बहुभाषिक, बहुधार्मिक नागरिकहरु हुनुहुन्छ । हामी उहाँहरुको समानुपातिक विकासका लागि काम गर्छौं ।

तपाईँ एकीकृत समाजवादीको तर्फबाट मेयर पदको उम्मेदवार, तपाईँहरुको संगठन बलियो छैन भनिन्छ, तपाईँसँग चुनाव जित्ने आधार के छ ?
संगठनको कुरा अन्त लागू हुनसक्छ, तर रौतहतटमा र चन्द्रपुरामा सो कुरा गलत हुन्छ । यहाँ हाम्रो अवस्था राम्रो छ । म विश्वास दिलाउन चाहान्छु कि हाम्रो जीत निश्चित छ ।

विगतमा नेकपा एमाले एउटै हुँदा समेत चन्द्रपुरमा तपाईँहरुले जीत निकाल्न सक्नु भएको थिएन, अहिले बिद्रोह गरेर नयाँ पार्टी बनाउनु भएको छ, जीतप्रति कत्तिको विश्वस्त हुनुहुन्छ ?
सांगठनिक हिसाबले हाम्रो उपस्थिति र सक्रियता दशैवटा वडामा छ । हामी मेहेनत गर्न तयार छौं । अरु फरक पार्टीका मान्छे पनि काम गर्ने मान्छेको खोजीमा छन् । व्यापारी, विद्यार्थी र बौद्धिक वर्गले मलाई सर्मथन गर्नु भएको अवस्था छ । अहिले सबै जनालाई मैले पार्टीको लागि भन्दा पनि विकासको लागि काम गर्छु भनेको छु । मैले काम प्राथमिकताको आधारमा गर्छु र नेतृत्वको अपनत्व सबैलाई गराउनेछु । यो कुरा अहिले चोक र चिया पसलमा हुने राजनीतिक गफमा पनि सुन्न सकिन्छ ।

केन्द्रीय स्तरमा गठनबन्धनको सरकार छ, स्थानीय तहको निर्वाचनमा पनि देशैभर गठबन्धन गर्ने निर्देशन थियो, चन्द्रपुरमा चाँही किन त्यो संभव भएन नि ? के भन्नुहुन्छ ?
चन्द्रपुरमा प्रयास नगरिएको होइन, तर गर्दागर्दै पनि गठबन्धन सम्भव भएन । हामी अब आफ्नो–आफ्नो हिसाबले चुनाव लड्ने र मित्रवत प्रतिस्पर्धा निष्कर्षमा पुग्यौँ । निर्वाचनमा हारे पनि जिते पनि हामीले जनाताको काम गर्ने हो । त्यसैले हारे पनि जिते पनि पक्ष विपक्ष दुवैको लागि काम गर्न सक्नु पर्छ ।

तपाईँहरु विभिन्न पार्टीबाट एक्लाएक्लै उम्मेदवार हुनुभएको छ ? चन्द्रपुरका जनताको नजरमा अरु उम्मेदवार भन्दा तपाईँ के कारण अब्बल हुनुहुन्छ ?
पहिलो कुरा म राजनीति र समाजसेवा दुवैमा छु । विद्यालय व्यवस्थापनदेखी, फुटबल खेलाडीदेखि अन्य सामुदायिक वन महासंघको जिल्ला अध्यक्ष, जनज्योति बहुमुखी क्याम्पसमा पनि म आवद्ध छु । क्याम्पसका कर्मचारीले तलब नपाएको अवस्थमा हामीले तलब दिने बनायांै, १८ वटा नयाँ सटर पनि थप्यौं । मैले विभिन्न संघसंस्थामा गरेको नेतृत्वबाट म अब्बल साबित भएको यहाँका जनताहरुले राम्ररी अनुभव गर्नु भएको छ । अरु पार्टीका प्रतिष्पर्धीहरुले केही न केही गर्नु भएकै छ, तर आम सर्वसाधारणको बुझाइमा नगरपालिकालाई सवल ढंगले चलाउने ल्यागत बाबुराम दाहालमा मात्रै छ भने बुझाई छ, नपत्याए तपाईँले स्थानीय स्तरमा जनमत पनि बुझ्न सक्नुहुन्छ ।

काँग्रेस, माओवादी केन्द्र, एमाले, एकीकृत समाजवादी र स्वतन्त्र उम्मेदवार पनि मेयरका प्रतिष्पर्धी हुनुहुन्छ, तपाईँको खास प्रतिष्पर्धा चाँही कुन पार्टीका उम्मेदवारसँग हुने आँकलन गर्नु भएको छ ?
हामी घरदैलोमा हिडिरहेका छौं । अहिले चन्द्रपुर नगरपालिकालागि कलम चिन्ह र बाबुराम दाहालको नाम लिइहरनु भएको छ । हामी कडा प्रतिस्पर्धामा छौं । यही सन्र्भमा धेरै ठूलो अन्तरको हार जित हुँदैन ।

चुनाव हो, जालझेल, साम, दाम, दण्ड, भेद सबैको प्रयोग हुने गर्छ, यसले गर्दा वादविवादहरु पनि हुन सक्छन्, यस्तो परिस्थितिलाई कसरी व्यवस्थापन गर्ने विचार गर्नु भएको छ ?
मैले सबै साथीहरुलाई संर्घषबाट पाएको उपलब्धिलाई झै झगडामा परिणत नगरौं भनिरहेको छु । हामी मित्रवत प्रतिस्पर्धा गर्छौं । आजको दिनसम्म हामी मित्रवत ढंगले अघि बढेका छौं, हामी यही रुपमा अघि बढ्छौं । बैरभाव साध्ने र दुस्मनीे गर्दैनौ, गर्नु हुन्न भनेका छौं ।

रौतहटको चन्द्रपुरलाई पूर्वप्रधानमन्त्री तपाईँहरुको पार्टीका अध्यक्ष माधव नेपालको गृहनगरका रुपमा पनि हेरिन्छ, यो निर्वाचनले चन्द्रपुरमा माधव नेपालको शाख जोगिएला ? परिस्थिति सारै जटिल छ भन्छन्, तपाईँलाई के लाग्छ ?
पूर्व प्रधानमन्त्रीको गृह नगरको रुपमा चन्द्रपुर परिचित छ । हामीलाई उहाँको नाम जोडिंदा निकै गर्व लाग्छ । उहाँले धेरै मेहनत गर्नु भएको छ । अस्ति उहाँ आउनु भयो, अब फेरी आउने पनि कुरा छ । अहिले हाम्रो भन्दा पनि राम्रोलाई नै जिताउनु पर्छ भन्नेमा सबैजना हुनुहुन्छ भन्ने हो । मैले अन्य राजनीतिक दलका साथीका कुरा पनि सुनिरहेको छु, उहाँहरुको राम्रो कुरा म पनि सिक्छु ।

तपाईँले आफू र आफ्नो पार्टीले चुनाव जित्ने कुरा गरिरहँदा कति मतान्तरले चुनाव जित्नु हुन्छ, केही आँकलन गर्नु भएको छ ?
समग्र रुपमा हेर्दा हामी दुई वडा बाहेक आठ वटा वडामा राम्रो छौं । अहिले १० वटा वडामा हामी आठ ओटामा राम्रो हुनु पनि राम्रो हो । हामी दुई हजारदेखि २५ सय मत अन्तरले विजयी हुन्छौं । दश वडामा हाम्रो बहुमत आउने सम्भावना छ ।

बैशाख ३० गते निर्वाचनको दिन आउन अब धेरै दिन बाँकी छैन, अन्त्यमा तपाईँका आम मतदाताहरुलाई केही भन्न चाहानु हुन्छ ?
म आम मतदातालाई के अनुरोध गर्छु भने अहिले उम्मेदवार त धेरै जना तपार्इँको घरमा आउनु भएको छ । स्वास्थ्य राम्रो बनाउनेका कुरा गरे भने तपाईँको बुबा आमा कहाँ छन ? शिक्षा राम्रो बनाउने भन्नेलाई तपाईँका छोराछोरी कहाँ छन् ? भनेर प्रश्न गर्नु होला । हिजो यहीको सामुदायिक विद्यालय ध्वस्त पार्नेहरु अहिले विद्यालय राम्रो पार्ने भनिरहेका छन् । स्थानीय सरकारले दिएको ऐन कानुनको प्रयोग नगर्नेहरुलाई पाँच वर्षका लगि समय खेर जान भोट दिने होइन । अहिले मतदाताले निधार खुम्च्याएर सोचेर मत दिनु आवश्यक छ । अहिले ठूलो संख्यामा मतदाता हुनुहुन्छ । पचास प्रतिशत मतदाता युवाहरु हुुनुहुन्छ । युवाहरुले ‘कलम छाप’ मा विश्वास गर्नु भएको हामीले पाएका छौं । म मतदाताहरुलाई उहाँहरुले दिएको भोट खेर नजाने हिसाबले काम गर्ने प्रतिवद्धता पनि व्यक्त गर्न चाहान्छु ।

अहिले दिएको भोटले भविश्य निर्धारण गर्ने भएकाले मतदाताले आफूले दिएको भोट आफ्नै लागि हो भनेर सोचिदिनु होस् भन्ने पनि आग्रह गर्न चाहान्छु । र, अन्त्यमा चन्द्रपुरवासीले कलम छापमा भरोसा गर्नु भएको कुरा हामीलाई थाहा छ । उहाँहरुको भरोसालाई पूरा गर्न हामीले मेहनत गर्ने छौं । अझै निर्वाचनका लागि केही दिन बाँकी नै छ । म सबै आम मतदाताहरुलाई हाम्रोलाई भन्दा पनि राम्रोलाई भोट हाल्नुस् भन्न चाहान्छु । त्यसका लागि ‘कलम छाप’ ले तपार्इँहरुको साच्चै हित गर्ने कुरा पनि भन्न चाहान्छु ।