बजारमा जहिले पनि अचम्म अचम्मका हल्ला चल्छन् । हाम्रो बजार एक दिन बढ्यो भने लौ बुलिस आयो भन्ने चलन छ । अर्काे दिन बजार घट्यो भने लौ खत्तम भन्ने हल्ला चल्छ । यी दुबै प्रवृत्ति गलत छन् । हामी लगानीकर्ताहरु अलिकति पनि धैर्य गर्न नसक्ने प्रवृत्तिका भैसकेका छौं । लगानी गरेपछि केहि न केहि धैर्यता पनि चाहिन्छ । धेरै हल्लाको पछाडी दौडनु पनि हुन्न । पुँजी बजारमा उतारचढाव सामान्य हुन् । समय अनुसार बजार तलमाथि भैरहन्छ । त्यसमा आत्तिनुपर्ने कारणै छैन् ।
अहिलेको बजारको अवस्था भनेकै सामान्य हो । लगानी गरेपछि सधैभरि बजार बढ्छ भन्ने ग्यारेन्टी छैन् । दोश्रो कुरा बजार सधै घटिरहने पनि होइन् । आजका दिनमा लगानीकर्ताहरु इन्स्योरेन्सहरुको पुँजी वृद्धि आउँछ, अनि सबैमा सर्किट लागेपछि सारा सेयर बेचेर हिडौँला भन्ने सोँचमा रहेछन् । अनि आज बजार घट्यो । किन धैर्य गर्न नसकेको त ? अलिकति बजार घट्ने वित्तिकै बेचेर हिड्नुपर्छ र ? कुर्ने साहस त चाहिन्छ । म २०५६ सालदेखि यहिँ बजारमा छु, आज र भोली पनि रहन्छु । मेरो जीवनमा बजार घट्यो भनेर कहिल्यै आतंकित भएको छैन् ।
पहिलो कुरा त बुझेर लगानी गर्नुपर्छ । दोश्रो कुरा लगानी गरिसकेपछि धैर्यता चाहिँ अवश्य चाहिन्छ । लगानीकर्ताहरु साना र ठूला हुँदैनन् । नयाँ र पुराना लगानीकर्ता मात्रै हुन्छन् । १० कित्ता किन्ने र लाखौं कित्ता किन्नेहरुका आफ्नो सम्पतिमा हैसियत बराबर हुन्छ ।
नयाँ लगानीकर्ताहरुलाई मेरो सुझाव छ की धैर्यतासहित लगानी गर्नुस् । कसैले भनेको सुनेको भरमा वा हल्लाका भरमा सेयर यति उचाईमा पुग्छ र यति कमाई हुन्छ भन्ने कुराको पछि नलाग्नुस् । यो आत्तिने समय नै होइन् । आर्थिक वर्षको ९ महिना सकिनै लागेको छ । सूचिकृत कम्पनीहरुको ९ महिनाको अपरिस्कृत वित्तिय विवरण आउने समय भैसकेको छ । हामीले त्यहि विवरण हेरेर लगानी गर्ने हो । आगामी ३ महिनापछि कम्पनीहरुले प्रतिफल दिन पनि सुरु गर्छन् ।
अर्काे कुरा भनेको अहिले पुँजी बजार धेरै तल आईसकेको छ । त्यसकारण पनि अझै धेरै घट्ने ठाउँ देखिन्न । मेरो कुरा गर्नुहुन्छ भने म तुल्सिराम ढकाल आजका दिन पाए बाई गर्छ तर सेल चाँही गर्दैन् । भात खाँदैन, बरु पानी मात्रै खाएर बाच्छ तर आफुसँग भएको सेयर बेच्दैन् । (नेपाल इन्भेष्टर्स फोरमका अध्यक्ष तुल्सिराम ढकालसँग गरिएको कुराकानीमा आधारित)
प्रतिक्रिया दिनुहोस्