Skip to content
Shikhar Insurance
National Life

‘टप टेन’ बैंकमा पछाडीका १० बैंकलाई मर्ज गराउन राष्ट्र बैंकले डण्डा चलाउनु पर्छ (विचार)

Hyundai
NCELL
NIMB

बैंक तथा वित्तीय संस्थाहरुको नियामक निकाय नेपाल राष्ट्र बैंक हो । वित्तीय क्षेत्रको सुधारका लागि राष्ट्र बैंकले जस्तो सुकै नीति निर्देशनहरु ल्याएर बैंक तथा वित्तीय संस्थालाई कार्यान्वयन गराउन सक्नु पर्छ । नियामकले समय दिन्छ, गर भनेपछि बैंक तथा वित्तीय संस्थाले गर्नु नै पर्छ । नियामकले नीति निर्देशन पालनाको वातावरणमात्र बनाइ दिने हो । आफुले ल्याएको र ल्याउने नीति निर्देशनले अर्थतन्त्रमा लामो समयसम्म प्रभावको निक्र्योल नियामकले गर्नु पर्छ ।

वित्तीय क्षेत्रसँगै समग्र अर्थतन्त्रको आवश्यकता बुझेर सोही अनुसारको नीति नियम नियामकले ल्याउनु पर्छ । म राष्ट्र बैंकको गर्भनर हुँदा पनि त्यही सोचेर बैंकहरुको पुँजी वृद्धि नीति ल्याएको थिएँ । पुँजी वृद्धिले धेरैको संख्यामा रहेको बैंक तथा वित्तीय संस्थाहरुको संख्या पनि घटाउँला भन्ने अपेक्षा त्यो बेलामा पुँजी वृद्धि नीतिमा थियो ।

आर्थिक वर्ष २०७२/७३ को मौद्रिक नीतिमार्फत् पुँजी वृद्धिको नीति ल्याएको थिएँ । त्यो समय २ अर्ब रुपैयाँ पनि पुँजी पुर्याउन गाह्रो भएका बैंकहरुलाई २ वर्षको समय दिएर ८ अर्ब कायम गरिसक्नु निर्देशन गरियो । अधिकांश वाणिज्य बैंकहरुले तोकिएकै समयभित्र ८ अर्ब रुपैयाँ पुँजी पुर्याइसकेको थिए ।

पुँजी वृद्धिको नीतिमा नियामकले समय दिएर कार्यान्वयन गराएको हुँदा लक्ष्य अनुसार नै समयमै सफल भयो । पुँजी वृद्धि नीतिले पनि मर्जर गराउन नसकेको वाणिज्य बैंकहरु हुन् । वाणिज्य बैंकहरुको मर्जरका लागि विभिन्न नीतिहरु बनाइएका छन् । तर त्यसको कार्यान्वयन गराउनमा अहिले राष्ट्र बैंकले कुनै तदारुक्ता देखाएको जस्तो लाग्दैन । कार्यान्वयनको पाटो भनेको निश्चित समय दिएर गराउँदा मात्र पुर्ण रुपमा हुनसक्छ ।

वाणिज्य बैंकहरुको संख्या घटाउने भनेर राष्ट्र बैंकले विभिन्न सहुलियतका प्याकेज मौद्रिक नीतिमार्फत् पस्किएको छ । तर, ती सहुलियतमा बैंकहरु आकर्षित भइरहेका छैनन् । त्यसमा त राष्ट्र बैंकले समय तोकेर मर्जर हुन निर्देशन दिनु पर्ने हो । समयसीमा नै नभएपछि बैंकहरु आफ्नो सहजताले नीति कार्यान्वयनको पाटो खोज्छन् ।

प्रमुख कार्यकारी अधिकृत वा अध्यक्षले आफ्नो बैंक स्वेच्छाले मर्जर गराउन कि चाहन्छ ? जब की आफ्नो बैंक मर्जरमा गएपछि २ जना सीइओ र अध्यक्षबाट १/१ जना छान्नु पर्छ । ४ जना डेपुटी सीइओ भए २ जनामा आउँछन्, १८ जना सञ्चालकहरु ९ जनामा आउँछन् । बैंक व्यवस्थापनको टिप त्यही अनुसारले काँटछाँट हुन्छ । खाइपाइ आएको पद सेवा सुविधा कटौती हुन सक्छ । त्यसैले बैंकका सीइओ, अध्यक्ष, सञ्चालकहरुले मर्जरको आवश्यकता महशुस गर्लान् र मर्जर गरेर बैंकहरुको संख्या घटाउँला भन्दै केन्द्रिय बैंकले बाटो पर्खियो भने पर्खेको पर्खै हुन्छ ।

केन्द्रीय बैंकले यसरी पर्खिने होइन, किन की केन्द्रीय बैंकले नियामकको भुमिका आवश्यकता अनुसार निभाउन सक्नु पर्छ । नियामकले नीति निर्देशन कार्यान्वयन गराउन सहुलियत दिएर फकाउने मात्र होइन, डण्डा पनि चलाउन सक्नु पर्छ । बैंकलाई स्वतन्त्र रुपमा तिमीहरु जे गर भनेर छोड्यो भने त, सीइओ, अध्यक्ष, सञ्चालक भइरहेको बेला त्यो पदबाट भोली आफु हटिन्छ भने उनीहरुले किन मर्जर गराउँछन् ?

मर्जरमा सहभागी हुन चाहने बैंकहरुको लागि राष्ट्र बैंकले मापदण्ड तोक्ने दिएर स्वतस्फूर्त मर्जर हुन सयमसीमा तोक्ने । त्यो समयसीमा मर्जर नहुने ‘फोर्स’ मर्जर पनि गराउन सक्ने अधिकार केन्द्रीय बैंकसँग हुन्छ ।

बैंकको मर्जर नीति ल्याउँदा संख्या घटाउने लक्ष्य मात्र थिएन । बैंक तथा वित्तीय संस्था मजबुत गराउने, ठु-ठुला परियोजनामा नेपाल भित्रैकै बैंकहरुबाट लगानी गर्न सक्ने क्षमताको बनाउने हो । त्यही लक्ष्यले गर्दा पुँजी वृद्धिको नीतिमा धेरै बैंकहरु मर्जर भए । त्यसमा अपुग भएको महशुस गरी मैले वाणिज्य बैंकहरुबीच नै मर्जर गराउने भनेर प्रतिवद्धता पेश गर्न निर्देशन दिएको थिएँ ।

एक महिनाको समयसीमा तोकेर मर्जरको प्रतिवद्धता मागिएको थियो । त्यसबीच नै सबै वाणिज्य बैंकहरुले मर्जरमा सहभागि हुन तयार छौं भनेर प्रतिवद्धता बुझाएका थिए । त्यसको बाटो पहिल्याई दिने काम राष्ट्र बैंकको थियो । जुन अहिलेसम्म गर्न सकेको देखिँदैन ।

हिजोको दिनमा राष्ट्र बैंकले बैंकहरुको पुँजी वृद्धि गराएको भएर नै होङ्सी सिमेन्ट उद्योगमा नेपालकै बैंकहरुले लगानी गर्न सकेका हुन् । त्यो बोहक पनि अहिले धेरैबाट ठुला परियोजनाहरुमा नेपालका बैंकहरुले लगानी गरेका छन् ।

पुँजी वृद्धिकै नीतिले गर्दा आज नेपालका बैंक तथा वित्तीय संस्थाहरु डुबेका छैनन् । केही वर्ष अघिमात्र १ करोड रुपैयाँ कर्जा नउठ्दा धेरै वटा बैंकहरु डुबेका थिए । करिब १८ वटा बैंक तथा वित्तीय संस्था डुबेर राष्ट्र बैंकमा समस्या ग्रस्त बैंक तथा वित्तीय संस्था हेर्ने विभाग नै गठन भएको थियो ।

तर, अहिले कोभिडको पछिको यस्तो अवस्थामा पनि बैंक तथा वित्तीय संस्थाहरु मजबुत छन् । डुबेका छैनन्, ठुला उद्योगहरुमा कर्जा लगानी गर्न सकिरहेका छन् । विकास निर्माणको लागि बैंक तथा वित्तीय संस्थाको लगानी आवश्यक छ । त्यसका लागि बैंक तथा वित्तीय संस्था नै पुँजीको हिसाबले बलियो हुन पर्छ ।

यतिमात्र होइन नेपालमा ठुला पुँजी भएका बलिया बैंक हुँदा अन्तर्राष्ट्रियस्तरमा पनि ठुला परियोजना आउँदा यहाँबाट पनि लगानीको अफर गर्न सकियोस् । अहिलेसम्म त अन्तर्राष्ट्रिय जगतमा नेपालमा बैंक नै छैन् वा भएपनि स–साना बैंकहरु मात्र छन् भन्ने छाप छ । नेपाल बैंकहरु ठुला बलिया अन्तर्राष्ट्रिय क्षमता भएको भएमा नेपालका ठुला परियोजनामा मात्र होइन अन्य मुलुकका परियोजानाहरुमा पनि लगानी गर्न सक्ने हुन्छन् ।

अहिले राष्ट्र बैंकले मर्जरको सम्झौता लिएर आउने सबै बैंकलाई मर्जरको उदेश्य नकेलाई स्वीकृतको पाइपलाइनमा राख्ने गरेको छ । मर्जरमार्फत् संख्या घट्दै बैंकहरु बलिया होउँन् भन्ने उदेश्य राष्ट्र बैंकको पहिले देखिकै हो । तर, संख्या कस्तो बैंकको घटाउने र कस्तो बैंकलाई कस्ता बैंकमा मिसाउने भन्ने कुराको अध्ययन राष्ट्र बैंकले गरेको हुनुपर्ने हो ।

वित्तीय सुचांकमा राष्ट्रियस्तरका विकास बैंकहरुभन्दा पछि पर्ने वाणिज्य बैंकहरु पनि छन् । त्यस्ता बैंकहरुले बजारमा स्वस्थ प्रतिस्पर्धा गर्न सक्दैनन् र नीति निर्देशनमा विभिन्न तबरले ‘लुप होल’ खोजी कारोबार गर्दा वित्तीय जोखिम निम्तिन सक्छ । त्यसैले ठुला बैंकले साना वा बलिया बैंकले कमजोर बैंकसँग मर्जर गराउँदा बन्ने बैंक हरेक तबरबाट बलियो र प्रतिस्पर्धी हुन्छ भन्ने उदेश्यले नै वाणिज्य बैंकहरुको संख्या घटाउन पर्छ भनेको हुँ ।

अहिले त वित्तीय सुचांकमा १ नम्बरको सुचीमा रहेको बैंक र २ नम्बरमा हुने बैंकले मर्जर गछौं भनेर आएपनि राष्ट्र बैंकले स्वीकृति दिन पछि हटेको छैन । मैले यस्तो प्रकारको मर्जर होस् भने वाणिज्य बैंकहरुको संख्या घटाउनु पर्छ भनेको हैन् ।

सञ्चालनमा रहेका २७ वाणिज्य बैंकमा वित्तीय सुचांकमा २७ नम्बरमा वा पुछारमा रहेका बैंकलाई ‘टप टेन’ बैंकहरुले लिउँन भन्ने उदेश्य राखेको थिएँ । मेरो कार्याकाल रहँदासम्म वाणिज्य बैंकहरुको मर्जरको काम पनि केन्द्रिय बैंकले सोही अनुसार गरेकै हो । सोही अनुसार नै जनता बैंक र ग्लोबल आइएमई बैंकलाई मर्जर गराइएको थियो । तर, अहिलेका गर्भनर सा’बले के सोचेर मर्जर नीतिलाई कार्यान्वयन गराउदै हुनुहुन्छ, त्यो सबैले देखिरहेका छन् ।

पछिल्लो समयको अभ्यासमा नेपाल इन्भेष्टमेण्ट बैंक र हिमालयन बैंकको मर्जर प्रक्रियाबाट धेरै पाठ केन्द्रिय बैंकले सिक्न सक्छ । यी बैंकहरु वित्तीय सुचांकमा पनि राम्रो भएका बैंकहरुको सुचीमा पर्छन् । राष्ट्र बैंकले राम्रो वित्तीय सुचांक भएका बैंकहरुलाई आपसमा मर्जर गराउने प्रक्रियामा राख्ने होइन । कमजोर वित्तीय सुचांक भएका बैंकलाई मर्जर गर भनेर निर्देशन दिएर अध्ययन गर्न सहयोग गर्न सक्नु पथ्र्यो ।

यसरी हिमालयन र एनआइबीएलले आफुभन्दा कमजोर बैंकलाई मर्जरको लागि पार्टनर बनाएको भए अहिले प्रक्रिया सम्पन्न हुने सम्भावना धेरै थियो । तर, राष्ट्र बैंक कडा रुपमा प्रस्तुत हुन नसक्दा अहिले यी बैंकहरु लामो समय मर्जरको पाइपलाइनमा बसेर डिमर्जरको प्रक्रियामा छन् ।

नियमनकारी निकाय भनेको कडा रुपमा प्रस्तुत हुन सक्ने क्षमता भएको हुनु पर्छ । २०६२ सालसम्म नेपालका वाणिज्य बैंकहरुको पुँजी ५० करोड रुपैयाँ थियो । त्यसपछि नेपाल राष्ट्र बैंकले सबै वाणिज्य बैंकको पुँजी २ अर्ब रुपैयाँ पुर्याउनु पर्ने भनेर निर्देशन दियो । तर, समयसीमा भने केही तोकेको थिएन ।

त्यसको १० वर्षपछि २०७२ सालमा जम्मा ३२ वटा वाणिज्य बैंकमध्ये ६ वटा बैंकले मात्र २ अर्ब रुपैयाँ पुँजी पुर्याएका थिए । बाँकी बैंकहरुमा केही बैंकहरुको पुँजी ५० करोड रुपैयाँ नै थियो भने केहीले ७५ करोड, ९० करोड र ढेड अर्ब रुपैयाँसम्मले पुँजी बढाएका थिए । तोकिएको पुँजी पुर्याउन ती बैंकहरुले कुनै तदारुक्ता देखाएका थिएनन् । यो भनेको राष्ट्र बैंकले पुँजी थप गर्नको लागि ‘अन लिमिटेड’ समय दिएर नै भएको हो ।

जब म राष्ट्र बैंकमा गभर्नर भएर गएको थिएँ, त्यो समय २५/२६ वटा बैंक तथा वित्तीय संस्था डुबेका थिए भने कति त खारेजीमै गएका थिए । १७/१८ वटा बैंक तथा वित्तीय संस्था समस्या ग्रस्त भएर तिनीहरुलाई हेर्ने विभाग नै गठन भएको रहेछ । मेरै कार्यकालमा समस्याग्रस्त सबै बैंक तथा वित्तीय संस्थालाई राष्ट्र बैंकले उद्धार गरिसकेको थियो भने मेरै कार्यकालमा त्यो विभाग पनि खारेज गरिएको हो ।

त्यसैले, वित्तीय क्षेत्रको सुधारको लागि ल्याइएको नीति निर्देशन कार्यान्वयनमा ‘अन लिमिटेड टाइम’ हुँदैन । अहिले पनि राष्ट्र बैंकले वाणिज्य बैंकहरुको संख्या घटाउने भन्दै ‘अन लिमिटेड’ समय दिइरहेको छ । संसारभर केन्द्रीय बैंकले नीति बनाएर नियमनमा रहेका संस्थाहरुलाई समय दिएर कार्यान्वयन गराउँछ । तर, पछिल्लो समय राष्ट्र बैंकले नीति निर्देशन बैंक तथा वित्तीय संस्थालाई आफ्नो सहुलियतले कार्यान्वयन गर्नका लागि ‘अन लिमिटेड टाइम’ दिन थालेको छ । यस्तो फितलो कार्यान्वयनको पाटोले जतिनै राम्रो नीति निर्देशनको पनि प्रभाव अर्थतन्त्रको लागि फाइदाजनक भने हुने देखिँदैन ।

राष्ट्र बैंकले अहिले सञ्चालनमा रहेका वाणिज्य बैंकहरुलाई वित्तीय सुचांक वा वित्तीय स्वास्थ्यका केही मापदण्ड तोकेर वर्गिकरण गर्नु पर्छ । यसरी वर्गिकरण गरिएका बैंकहरुलाई मर्जर/प्राप्तिका लागि फकाउने वा फोर्स गर्ने ? त्यो केन्द्रीय बैंकले निर्धारण गरेर माथिल्लो सुचीमा परेका बैंकहरुलाई तल्लो सुचीमा रहेका बैंकलाई मर्जर/प्राप्तिको लागि निर्देशनसम्म दिनसक्ने अधिकार छ ।

राष्ट्र बैंक भनेको स्वायत्त निकाय हो । वित्तीय क्षेत्रको विकास विस्तारको लागि उसलाई जे पनि गर्न सक्ने अधिकार छ । यही अधिकारको प्रयोग गर्दै मैले आफ्नो कार्यकालमै बैंकहरुको पुँजी ४ गुणादेखि २५ गुणासम्मले बढाउन लगाएको थिएँ । त्यसअघि कसैले गर्न नसकेको काम मैले नै शुरु गरेको हुँ । म भन्दा अघिका गर्भनरहरुले न त समय तोकेर बैंकको पुँजी वृद्धि गराउन सक्नु भएको थियो, न त बैंक तथा वित्तीय संस्थाहरुको मर्जर नीति नै । न त सांसद सञ्चालकहरु हटाउन सकेको थियो । जे गरेँ, मैले नै केन्द्रीय बैंकको ‘पावर’ देखाएको हुँ ।

राष्ट्र बैंकले चाहेमा बैंक तथा वित्तीय संस्थालाई जे पनि गर्न सक्छ । तर आफु स्ययं निश्चित हुनु पर्छ कि, यो नीति निर्देशन बैंक तथा वित्तीय क्षेत्रको लागि फलदायि हो भनेर । राष्ट्र बैंकको नीति निर्देशनलाई अदालतले पनि छुन सक्दैन । त्यो अधिकारको प्रयोग राष्ट्र बैंकले अहिले गर्न नसकेको पक्कै हो । (नेपाल राष्ट्र बैंकका पूर्व गभर्नर डा. नेपालसँग गरिएको कुराकानीमा आधारित)

 

GBIME

प्रतिक्रिया दिनुहोस्