काठमाडौं । असार महिनामा पनि वाणिज्य बैंकहरुले निक्षेपको ब्याजदर नबढाउने भएका छन् । विगत ३ महिनायता यथावत रहेको ११.०३ प्रतिशत ब्याजदरलाई असार महिनामा पनि कायमै राख्ने वाणिज्य बैंकहरुले सहमति गरेका हुन् ।
ब्याजदर बढाउँदा थप निक्षेप नबढ्ने निश्कर्ष निकाल्दै असार महिनामा पनि पुरानौ दर कायम गरिने सहमति भएको नेपाल बैंकर्स संघका अध्यक्ष अनिल उपाध्ययले जानकारी दिए ।
‘ब्याजदर बढाउँदैमा थप निक्षेप संकलन नहुने रहेछ,’ संघका अध्यक्ष उपाध्यायले सिंहदरबारसँग भने, ‘दर बढाउँदा खर्चमात्र बढाउने भन्दै असार महिनामा पनि पुरानौ ब्याजदरलाई यथावत राख्ने एक तहको सहमति भएको छ ।’
तरलता अभावको अहिलेको अवस्थामा निक्षेपको ब्याजदर बढाउँदा अस्थिरता सिजना हुने उनको भनाइ छ । संघका सदस्य बैंकरहरुसँग अनौपचारीक रुपमा ब्याजदर नबढाउने सहमति भएको हुँदा आधिकारीक रुपमा संघले विज्ञप्ती नै जारी गर्ने उनले बताए ।
वाणिज्य बैंकहरुले गत माघको तुलनामा फागुन महिनामा मुद्दती निक्षेपको औसत ब्याजदर (१०.०३ %) को १० प्रतिशतले बढाएर अधिकतम ११.०३ प्रतिशत कायम गरेका थिए । वाणिज्य बैंकहरुका निक्षेपकर्ताले चैत, वैशाख र जेठमा सोही दरमै ब्याज पाएका थिए । अब असार महिनामा पनि सोही दरमा ब्याज पाउने निश्चित भएको छ । यता विकास बैंक र फाइनान्स कम्पनीका छाता संगठनहरुले बुधबारसम्म निर्णय गरिसकेका छैनन् ।
प्रतिक्रिया दिनुहोस्